64 serrîya xo de bi Kurdkî wendiş û nuştiş musa: Wayîrê ziwanê xo bivejîyê

Omer AKIN / MA / WAN

Mehmet Bîlîcî, 64 serrîya xo de Komeleya Arsîsa de bi Kurdkî wendiş û nuştiş musa. 

Komeleya Arsîsa ya Wanî, ziwan û kulturê Kurdan ser o xebatanê xo ramnena. Kursan de seba domanan asya destpêke û seba pîlan zî asta yewîne, asta dîyine, asta hîrêyine û asta mamostayîye de kursê ziwanî yenê dayene. 

‘Serrê musayîşî çin ê’

Mehmet Bîlîcî(64) yo ke asta yewîne de perwerde geno va, “Ez ameya nê serranê xo mi cuya xo de bi ziwanê xo 2 rêzî nênuştê. Ez Kurdkî qisey kena la nuştiş û wendiş çin bî. Mi zaf kêmanîya na rewşe ante û bi dest bi kursê Kurdkî kerd. Kursê ma 3 aşmî verî cû dest pêkerd. Sere de mi biney zehmetî ante la nika ez hem eşkena biwanî hem eşkena binusî.”

‘Ma ganî vera asîmîlasyonî xo ver bidê’

Bîlîcîyî dîyar kerd ke nika eşken abi Kurdkî şîîran binuso û va, “Ez vana qey ez newe ra ameya dinya. Ma Kurdî na mezeleya ziwanî de wayîrê kêmanîyan ê. Ma 40 serrî yo seba ziwan û kulturê xo xoverdayîş ramnenê la ma bi zanayîş asîmîle benê. Awanbîyayîşê komare de Meletî de kes Tirkî nêzanayêne la nika kes Kurdkî nêzano. Reyna bajaranê sey Wan û Amedî de ekserîyetê şarî Tirkî qisey keno. Na kêmanîyêka pîl a. Ma seba çi xo ver danê? Seba estbîyayîşê xo. Ma bindest ê, ma ganî ver ana rewşe xo ver bidê û wayîrê kultur û ziwanê xo bivejîyê. Heta ke ma ziwanê xo mepawê, ma nêşkenê bibê wayîrê çîyêk. Ma biewnê Cezayîr ra. 60 serrî yo bindestîya Fransa ra xelisîyayo la nika her çîyê înan Fransizkî yo. Seba ke ma zî mekewê nê halî ganî ma bibê wayîrê hişmendîye.”