Çareserî wedaritişê tecrîdî yo

în 9 sibatê 2024 - 16:00

  • Beşdaranê ‘Rayraşîyayîşê Azadîye yê Pîlî’ ra Parlamentera DEM Partî ya Dêrsimî Ayten Kordu derheqê çalakîya înan de ANFyî rê ercnayîşî kerdî.

Beşdaranê ‘Rayraşîyayîşê Azadîye yê Pîlî’ ra Wekîla DEM Partî ya Dêrsimî Aytene Kordu îfade kerd ke ê seba azadîya şarê kurdî û Serekê PKKyî Abdullah Ocalanî têkoşîn kenê û wina qisey kerd: ”Key tecrîd biqedîyo çareserîya demokratîke zî do dest pêbikera.”
Ayten Kordu îfade kerd ke ê her ca de bi coşî hetê şarî ra yenê pêşwazîkerdene û vat: “Ma şarî ra moralêko pîl girewt. Seke zanîyeno tepişteyî grevê vêşanîye de yê û keye û merdimê tepişteyan de Nobeta Edaletî de yê. Seba azadîya Birêz Abdullah Ocalanî qerardarîyêka pîle est a. No rayraşîyayîş beşêkê na qerardarî yo. Bi taybetî cinî û dadîyî bi kelecanêkê pîlî ma pêşwazî kenê.”
Ayten Kordu pare kerd ke cinîyî serkêşîya rayraşîyayîşî kenê û vat: “Tecrîdê vera Birêz Ocalanî yeno manaya tecrîdkerdişê şaran. Ma hem seba azadîya xo hem zî seba azadîya Birêz Ocalanî nê têkoşînî kenê. Key tecrîd biqedîyo çareserîya demokratîke zî do dest pêbikera. Coka ganî cade Birêz Ocalan azad bibo.”
Ayten Kordu ard ziwan ke ganî masaya dîyalogî newe ra bêra ronayene û vat: “Ma hol zanenê ke bi dîyalogan ma eşkenê pêro meseleyan çareser bikerê. Hem seba azadîya xo, hem seba azadîya Birêz Ocalanî hem zî seba azadîya şaranê Tirkîya û Kurdistanî ma do heta peynî Rayraşîyayîşê Azadîye yê Pîlî bikerê. Ma do qetî ser bikewê. Ma bi nê moral û hêzî têgêrenê.” XWEBÛN

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.