Çiya Kurd: Zeîfbîyayîşê Îdareyê Xoserî seba dinya tehtîd o

în 9 sibatê 2024 - 17:15

  • Hemserekê Daîreya Têkilîyanê Teberî ya Îdareyê Xoserî yê Bakur û Rojhelatê sûrîyeyî Bedran Çiya Kurdî dîyar kerd ke DAÎŞ hêrişanê Tirkîya ra havile gêno.

MAHMUT ALTINTAŞ / RIHA

Bakur û Rojhelatê Sûrîyeyî raştê hêrişanê Tirkîya yeno. Hêrişa pêyene Qamişlo de merkezê Asayîşî rê bîye û 2 endamanê asayîşî cuya xo vîndî kerde. Derheqê rewşa mintiqa de Hemserekê Daîreya Têkilîyanê Teberî ya Îdareyê Xoserî Bedran Çiya Kurdî qisey kerd.
 
‘Tirkîya sûcê şerî kerdo’
Çiya Kurdî bale ante hêrişan ser o û dîyar kerd ke hêzanê mîyanneteweyîyan ra veng nêvejîyayo û va, “No zî ramojneno ke kombîyayîşê Astanayî de derheqê hêrişan de şerîkîyêke ameya awankerdene. Tirkîya binawanîya mintiqa hedef girewt û çimeyê ciwîyayîşî ameyê çinkerdene. Nê hêrişî vera şaranê mintiqa qetlîamêk o. Goreyê muqaveleyanê mîyanneteweyîyan zî Tirkîya sûcê şerî kerdo. Xora Wezîrê Karanê Teberî yê Tirkîya verê hêrişan vatibi ma binawanîye hedef gênê. Vatişê nê çîyan zî sûcêk o. Pêro dinya eşnawite la kesêk ra veng nêvejîya. Tirkîya zî na bêvengîye de hêrişê xo zêdînayê.”
 
‘Ma NYyî rê muracat kerd’
Çiya Kurdî dîyar kerd ke xebatê newe ra awankerdişî dewam kenê û va, “Hêrişan ver şaran zaf zirar dî. Çimeyê cuye ameyê çinkerdene. Îdareyê Xoserî cade dest bi karî kerd û birînî ameyê piştene. Şarê mintiqa zî vera hêrişan îradeyo pîl ramojna. Ma seba sûcanê şerî yê Tirkîya Neteweyanê Yewbîyayîyan (NY) rê muracat kerd. No derheq de tebera zî xebatî yenê ramitene. Tirkîya verî ra nata Kurdan çin hesibnena û heqanê Kurdan înkar kena. Bin ê hêrişan zî wazena destkewteyanê Kurdan çin bikera. Ma do vera nînan pêro pîya xo ver bidê.”
 
DAÎŞ havile gêno
Çiya Kurdî dîyar kerd ke hêrişanê Tirkîya ra grûbê sey DAÎŞî havile gênê û va, “2yê Sibate de Qamişlo de 2 endamê asayîşî ameyê şehîdkerdene. Grûbê ke girêdayeyê Sûrîye û Îranî Dêra Zor, Minbic û Reqa de eşîran vera Îdareyê Xoserî fît kenê û wazenê kaos vejê. DAÎŞî nê kaosî ra havile girewte û faalîyetê xo zêdînayo. Ma wazenê wa kaos bêro wedartiş. Coka ma wazenê wa meleseyî bi dîalog bêrê çareserkerdene. Ma bi pêro sazîyanê xo kenê ke destkewteyanê şaran bipawê.”
 
‘Ganî paştî bidîya Îdareyê Xoserî’
Çiya Kurdî behsê operasyonê Kampa Holî kerd û va, “Vera DAÎŞî xora tim operasyonî yenê kerdene. Seba ke DAÎŞ reyna hêzdar mebo ma nê operasyonan kenê. Falîyetê înan ê kampan zêdîyayê. Ma hêzanê koalîsyonî reyde Kampa Holî de operasyonêk kerd û netîceya operasyonî de 85 endamê DAÎŞî ameyê girewtene û xeylê çekî û muhîmmatî kewtê dest. Îdareyo Xoser vera pêro çşaranê dinya nê xoverdayîşî dano. Tirkîya înan vînena û hêrişanê xo zêdînena. Hetêk ra zî hetê hêzanê Îranî ra baregeha Emerîka rê hêrişe ameye kerdene. Nê hêrişî yewbînî ra cîya nîyê û leteyê eynî konseptî yê. Eke Îdareyo Xoser zeîf bibo, nê grûbê tîyayî pêro dinya rê benê tehtîdêk. Hêrişê Tirkîya û Îranî feyde danê nê grûban. Ganî vera ney zî hêzê mîyanneteweyî paştî bidê Îdareyê Xoserî.” MA

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.