El Melîcî: Dewaya Abdullah Ocalanî dewaya pêro azadîwaştoxan a

• Nuştoxo Misirij Îlhamî El Melîcîyî dîyar kerd ke ganî seba azadîya Abdullah Ocalanî pêro çîyî bêrê kerdene.

MUHSÎN EL MESRÎ / ANHA /  QAHÎRE

Endamê Seba Azadîya Ocalanî Înîsîyatîfê Ereban nuştoxo Misirij Îlhamî El Melîcîyî, derheqê komploya mîyannetewîye û azadîya Serek Abdullah Ocalanî de qisey kerd. El Melîcîyî va, “Bi komplo ame waştiş ke Kurdan ser o bandorê Abdullah Ocalanî bêro şikitene. La netîceya xoverdayîşî de na komplo ameye puçkerdiş. Partî(PKK) bi saya sîstemêko rayberê înan awan kerd xo ver da. Xoverdayîşê înan ame pîlkerdiş. No xoverdayîş bingeyê xo fikranê Serekatîye ra geno. Fikrê Ocalanî zindanê Tirkan ra xo rasnayê pêro Kurdan.”

‘Dewaya pêro şaran a’

El Melîcîyî va, “Dewaya Abdullah Ocalanî dewaya pêro azadîwaştoxan a. Dewaya heqanê merdiman û cuya rûmetine ya. Dewaya pêro şaranê bindest û azadîwaştoxan a. Coka seba ke Abdullah Ocalan bieşko keyeyê xo de û şarê Kurdî de bikewo têkilîyê, ganî pêro azadîwaştoxê dinya kede bidê û seba ney têbigêrê.”

El Melîcîyî bale ante tecrîdî ser û va, “Rejîmê Tirkîya sey dîktatorîye kar keno û vera heqanê merdiman bêrûmetîye keno. Ganî rêxistinê hiqûqî yê mîyannetewîyî vera kerdenanê Tirkîya vengê xo bikerê.”