Hemsereka DBPyî Salîha Aydenîze: CPTyî teşwişeyê ma zêdînayê

• Aydenîze derheqê zîyaretê CPTyî de va, “Ganî CPT cade raporê xo raya pêroyîye rê eşkera bikero.”

Rêxistinê bajarê Wanî yê DBPyî kongreya xo ya 6ine viraşte. Kongre ewyanêka veyveyî de ameye viraştene. Hemsereka Pêroyî ya DBPyî Salîhe Aydenîze, parlamentere HDPyî û xeylê kesî beşdarê kondre bîyê. Kongre bi payravindertişê hurmetî  dest pêkerde. Dima hetê hemserekanê DBPyî yê Wanî ra qiseykerdişî ameyê kerdene.

‘Keyeyê Barzanîyan îxanet keno’

Kongre de Hemsereka Pêroyî ya DBPyî Salîhe Aydenîze qisey kerd û va, “Kurdî wextêkî muhîmî ra vîyarenê. Çend rojî verî Silêmanîye de embaza ma Nagîhan Akarsele hetê tetikkaranê Tirkîya ra ameye qetilkerdiş. Ma zanê ke no tetikkar bi rayanê resmîyan şîyo uca û nê qetlîamî kerdo. Xora sefîrê Tirkîya zî eynî çî va. Wa her kes bizano ke, ma do xoverdayîşê înan bêwayîr meverdê. Erdoganî 28ê Adare 2006î de derheqê çalakîyanê Dîyarbekirî de vatibi ‘Cinî bê zî doman bê zî çi hewce keno ma do bikerê’. Ê Rojan de 6 domanî ameybî qetilkerdiş. Vateyê sefîrî yê Erdoganî ra cîya nîyê. Serranê 90an de hetê tetikkaran ra 17 hezar kesî ameyê qetilkerdiş. Kerdenê ewroyî bingeyê xo serranê 90an ra genê. La ê se kenê bikerê, Kurdî do xoverdayîşê xo ra fek rameverdê. Îradeyê Kurdan roje bi rojê bi xurt û rasa ewro. Qetlîamê newayan nika zî bi destê PDK û Barzanîyan yenê kerdene. No zîhnîyet şarê Kurdî rê îxanet o. Wa keyeyê Barzanîyan bizano ke, ma do ney çirey qebul mekerê. Pêro rêxistinê Kurdistanî û şar ganî vera nê îxanetî de vindero.”

‘Cinîyê Kurdî do bi xoverdayîşê xo nê zîhnîyetî binbifînê’

Derheqê qetilbîyayîşê Jîna Amînî de Aydenîze va, “Ma selamanê xo erşawenê înan ke porê xo kerdo alaya azadîye. Senî ke cinîyan Rojava de bi xoverdayîşî cuyêka azade awane kerde û dinya rê bîye nimune, Rojhelat de zî do bi sloganê ‘Cinî, Cuye, Azadî’ cuyêka azade awane bikerê. Hevrîn Xelefe, Denîz Poyraze, Nagîhan Akarsele û Jîna Amînî hetê eynî zîhnîyetî ra ameyê qetilkerdiş. No zîhnîyeto tarî wa bizano ke, cinîyê Kurdî do bi xoverdayîşê xo ey binbifînê. Rejîmê qesran û faşîstan do birijîyo. Heta komelêko azad awan bibo, xoverdayîşê cinîyan do dewam bikero.”

‘Ganî her kes bibo vengê hepisxaneyan’

Aydenîze va, “Hepisxaneyan de polîtîkayê îşkenceyî yenê ramitene. Hema vîzêr hepisxane de embazêkî ma ame qetilkerdiş. Faşîzmê AKP-MHPyî îqtîdarê xo dşişmenetîya Kurdan ser ra ramneno. Hepisxaneyî bîyê mergxane. Erdogan do 15ê Teşrîna Verêne de bêro Dîyarbekir û hepisxaneyî bikero merkeze kulturî. Şima nêşermîyenê? Ewro pêro hepisxaneyî bîyê sey zindanê Dîyarbekirî. Ameyîşê Erdoganî seba ma çîyêk îfade nêkeno. Rewşa hepisxaneyan sey eyneyî hemverê ma de ya. Tede sûcî, îşkenceyî û qetlîamî estê. Berpirsîyarê nê qetlîaman Wezaretîya Edaletî, îdareyê hepisxaneyan û îqtîdarê AKPyî yê. Vera nînan xeylê bajaran de hetê dayîkan ra Nobetê Edaletî yenê girewtene. Seba ke nê qetlîamî mebê, nê nobetî yenê girewtene. Ma ganî dayîkanê xo tena meverdê. Ganî her kes bibo vengê hepisxaneyan û verê binpaykerdişan bêro girewtene. Heta ke waştişê dayîkan bêrê ca, ma do xoverdayîşê xo biramnê.”

‘CPTyî teşwişeyê ma zêdînayê’

Hemsereka Pêroyî ya DBPyî Salîha Aydenîze peynî de va, “Tecrîdê Îmraliyî her ca ra vila bîyo. Nika qanûnê sansurî yeno vetene. Wazenê tecrîdî biramnê. Wa her kes bizano ke, adresê çarreseîye û krîzan Birêz Ocalan o. La ma nêşkenê Birêz Ocalanî ra xebere bigerê. Demêk verî cû hetê CPTyî ra zîyaretêk ame kerdene. La nê zîyaretî ver teşwişeyê ma hîna zêdîyayê. Ganî CPT raporê xo raya pêroyîye rê eşkera bikero. No proses wîjdanî û hiqûqî nîyo. Seba ke tecrîd wedarîyo, ma her ca de xoverdayîşanê xo ramnenê. Krîz û kaosî bi tecrîdî yenê girankerdiş. Ganî Birêz Ocalan miheqeq bi fîzîkî azad bibo. Seba ney zî ma ganî xoverdayîşê xo pîl bikerê. Azadîya Birêz Ocalanî, azadîya cinîyan û azadîya şarê Kurdî ya.”

Qiseykerdişê Aydenîze ra dima weçînitiş ame viraştene û hemserektîye rê Şengul Polat û Harûn Okay ameyê weçînayîş

MA / WAN