Koçerî wareyan de vera mesrefan û krîzî xo ver danê

TURABÎ KÎŞÎN / PÎRHA / ÇEWLÎG

Koçerê Qerejdaxî şîyê wareyanê Çewlîgî. Koçerî tîya de heywananê xo weye kenê û payîz reyna agêrenê Qerejdax.

Koçerî berhemanê qatixî roşenê û pê debareyê xo kenê. Seba ke krîzê ekonomîyî pîl bîyo, mesrefî zêdîyayê û koçerî zî na rewşe ver dejaye yê. Kirayê wareyan zaf bîyê vayî û merayî zî kêmî bîyê. Wareyan de kar zaf o. Cinîyêk her roje se mêşnayan doşena. Koçerî vanê wareyî weş ê la karê ma zaf çetin o.

Şewdirê Sibayî de wirzenê

Şewdirê sibayî de her kes wirzeno. Mêşnayî yenê ditiş û karê meşke dest pêkeno. Dima no şit seba peynîrviraştişî yeno hedrekerdiş. Emser krîzî ver mesrefî zêdîyayê û karê koçerîye zaf bîyo zehmet. Koçeran ra yew vano, “Mi xo dîyo nêdîyo ez nê karî keno. Ma 15 rojî yom  ke ameyê wareyê dewa Cafranî. Her çî zaf bîyo vay. Merayî bîyê vay. Raşta zî ma rê zaf çîyêk nêmaneno. Verî cû koçerîye hîna weşe bî.