‘Rayraşîyayîşê Azadîye’ 

• Hemserekanê DBPyî dîyar kerd ke ê do 13ê Sibate de birasê Amed û înan gazîye kerde ke wa Amedijî wayîrê rayraşîyayîşî bivejîyê.

Rayraşîyayîşê Azadîye bêvindertiş 2 perran ra dewam keno. Yeno pawitene ke her di perrê rayraşîyayîşî do 13ê Sibate de Amed de birasê pê. Beşdaranê rayîrşîyayîşî ra Hemserekanê DBPyî Keskîn Bayindir û Çîgdem Kiliçgun Uçare seba ke wayîrê rayraşîyayîşî bivejîyê, Amedijan rê gazîye kerde.
 
Gazîya Hemserekanê DBPyî
 Bayindirî va, “Raywanê Azadîye do 2 perran ra zî 13ê Sibate de Amed de birasê pê. Ma şarê Amedî rê gazîye kenê; ma zanê ke şarê Amedî do wayîrê nê rayraşîyayîşê tarîxîyî bivejîyo. Amed, paytextê xoverayîşê Kurdan o. Şarê ma do 13ê Sibate de bi awayê festîvalî bêro vera raywanan. Şarê Amedî ganî mehla bi mehla, keçe bi kuçe û keye bi keye bigêro û seba beşdarîya rayraşîyayîşî bixebitîyo.”
 
Çîgdem Kiliçgun Uçare zî va, “Ma seba şarê xo, ziwanê xo û xoverdayîşê xo bi rojan ra nata rayra yê. Ma do 13ê Sibate de birasê Amed. Ma wazenê pêro şarê Amedî xo het de bivînê. Ma prosesêkî xirabî ra vîyarenê. Eke ma paştî bîbê yewbînî, ma eşkenê nê zulmatî ra bivejîyê. Ma pêro şarê xo rê gazîye kenê ke wa Amed de hetê ma de bê.” MA / AMED