Şahidê fermanî Kemal Îsa: Ganî sûdarî Laheyî de bêrê cezakerdiş

duşem 1 tebaxê 2022 - 17:14

  • Kemal Îsayî va, “Ganî qetlîam hetê parlamentoya Iraqî ra sey qirkerdişî bêro şinasnayîş û sûcdarî Laheyî de bêrê cezakerdiş.”

ÊZDÎN ŞENGALÎ / ANHA

Kemal Îsa dewa Sîbayî ra yo. Na dewa Êzidîyan de 4 mezelê komî ameyê tespîtkerdiş. Kemal Îsayî Şahidê fermanî yo û qetlîamî ser o qisey kerdo.

Badê remayîşê PDKyî Daîşî qetlîam kerd

Kemal Îsayî derheqê xoverdayîşê dewa Sîbayî de va, “Pêşmergeyî ke şîyê, ma tena mendê. Daîşî bi doçkayan guleyî vaynayê şarî ser. Kes nêşkayêne dewe ra vejîyo. Garajê Sîbayî de di mezelê komî estê. Ma nêzanê nê mezelan de çend kesî estê. Xeylê kesî hetê Daîşî ra ameyê dardekerdiş.”

‘Ma paştîdayîşanê Rojavayî xo vîrî ra nêkenê’

Kemal Îsayî va, “Ma fermanî ra dima şîyê Serêkanî. Ma uca de 3 serrî mendê. Şarî ma reyde her çîyê xo pare kerd. Ma holîya înan xo vîrî ra nêkenê. Her roje 3 dewan seba Şengalijan werd kerdêne hedre. Ma dima şîyê hetê Qendîl û dima agêrayê erdê xo ser.”

‘Wa qirkerdiş bêro şinasnayîş û sûcdarî bêrê cezakerdiş’

Kemal Îsa nika dewa Sîba Şêx Xidirî de cuwîyeno. Kemal Îsayî peynî de va, “No yew qetlîam bi. Waştêne Êzidîyan qir bikerê. Xeylê welatanê Ewrûpayî de qetlîam sey qirkerdişî ame şinasnayîş. Ganî parlamentoya Iraqî zî bişinasna. Sûcdarî ganî bêrê mehkemakerdiş û Laheyî de bêrê cezakerdiş.”

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.