Şengalî de yadkerdiş: Ganî ferman sey qirkerdişî bêro şinasnayîş

çarşem 3 tebaxê 2022 - 16:58

  • Serrgêra fermanî de hetê dezgeyan ra yadkerdişêk ame viraştene û înan va ganî ferman hetê pêro welatan ra sey qirkerdişî bêro şinasnayîş.

DAIŞ 3ê Tebaxe 2014î de hêrîşa Şengalî kerde û qetlîamêk viraşt. Nê qetlîamî ser ra 8 serrî vîyartê. Serrgêra fermanî de hetê dezgeyan ra yadkerdişêk ame viraştene. 21 dezgeyê komela sîvîle Şengal Sînûneyî de ameyê pêser. Yadkerdiş bi pay ra vindertişê rûmetî dest pêkerd û seba merdîyan findî ameyê tavistene.

Derheqê fermanî de sînevîzyonêk ame ramojnayîş. Dima Nadîa Muradî ya ke hetê QSDyî ra destê Daîşî ra ameybî xelisnayîş û Xelata Haştîye ya Nobelî girewtibî, bi têkilîya gande beşdarê yadkerdişî bî.

Yadkerdişî de bi nameyê dezgeyanê komela sîvîle malûmatêko şerîk ame kerdene. Malûmatî de ame vatiş ke, “Fermanî ser ra 8 serrî vîyertê la bandorê ci hema zî ramenê. 2 hezar 882 Êzidîyî hema zî vîndîbîyayeyê. 83 mezelanê komî ra tena 31 ameyê akerdiş. 68 qubeyê tarîxîyî hetê Daîşî ra ameyê rijnayîş. Heta nika Daîş tena 2 rey mehkema bîyo. Hetê dewletan ra seba Şengalî newe ra awankerdişî gamêk nêerzîyaya.”

‘Ganî Daîşijî bivejîyê mehkema’

Dewamê malûmatî de nîya ame vatiş: “Seba ke Şengal newe ra bêra awankerdiş gamî nêerzîyenê. Heta nika 11 dewletan qirkerdişî şinasnayo. Ma vanê ganî pêro dewletî qirkerdişî bişinasnê. Ganî Daîşijî pêro dewletan de bivejîyê mehkema. Ganî Iraq qanûno ke seba cinîyanê Êzidîyan ê ke ameybî xelisnayîş, biyaro ca. Dejê şarê ma dewam keno û heta nika gamê pîlî nêameyê eştiş. Ma Neteweyanê Yewbîyayîyan û pêro dezgeyanê Êzidîyan ra vanê seba ke waştişanê Êzidîyan ca biyarê têbigerê û bixebitîyê.”


‘Ganî rewşa vîndîbîyayîyan ser o cigêrayîşî bêrê kerdene’

Malûmatî de peynî de ame vatiş ke, “Şarê ma seba ke bieşko cuya xo awane bikero ganî biraso heqanê xo yê bingeyinan. Ganî hetê Neteweyanê Yewbîyayîyan û Iraqî ra rewşa vîndîbîyayîyan ser o cigêrayîşî bêrê kerdene. Ma pêro şehîdanê fermanî yad kenê û canfedayanê Şengalî rê sipas û hurmet kenê. Danî Êzidîyê ke deste Daîşî de yê bêrê azadkerdiş. Her kes vera şarê ma berpirsîyar o û ganî her kes berpirsîyarîya xo biyaro ca.”

MA / MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.