Serrgêra qeltîamê Madimakî: Zîhnîyeto qetilkar îqtîdar de yo

• 29 serrî verî cû 33 hunermendî Sêwas de, Otelê Madimakî de ameyê qetilkerdiş.

29 serrî verî cû 33 hunermendî Sêwas de, Otelê Madimakî de ameyê qetilkerdiş.

51 hunermendî seba şahîyanê Pîr Sultan Abdalî şîbî Sêwas. Do panelî biameyêne viraştene û konserî biameyêne dayene. Roja diyîne ya şayîyan de qerebalixêk ver bi otele Madimakî kewt rayîr û înan va, “Sêwas do laîkan rê bibo mezele’. Qerebalix vera-vera bi pîl û hûmara înan rasaye 15 hezarî. Înan kerrayî eştê otel û camî şikitê. Hêverî wesayîtê vernîyê otelî ameyê vêşnayene û dima otel ame vêşnayene. Kes mudaxeleyê înan nêkerd û şewat zî nêame hewnakerdiş. Wexto ke îtfaîye ame, hinî adir pêşîyabi otel.

Zîhnîyetê Îqtîdarî

Qetlîamê Madimakî de 33 kesî merdê û serra 29 serrî vîyertê. Serekkomarê ê wextî Suleyman Demîrelî va, “Mesela munferît a. Şar ameyo tahrîkkerdiş. Pêrodayîşêk çin o. Otelêk vêşayo û însanî merdê.” Serekwezîra ê wextî Tansû Çîller zî vatibî, “Şikir ke, çîyêk şarê ma yê teberê otelî rê nêbîyo.”

Sûcdaran beraat kerd

Qetlîamî ra dima 35 kesî gêrîyayê binê çimî û dima nê bîyê 190 kesî. Înan ra 66 kesî ameyê veradayîş. Dewaya ê bînan DGM de serrêk dewame kerde. Înan ra tayênan ceza girewte û 37 kesî ameyê veradayîş.

Mesajê Erdoganî

Dewaya qetlîamî ya esase 2012î de vîyartişê wextî ver ameye padayene. Serekwezîrê ê wextî Tayyîp Erdoganî vatibi, “Wa seba miletê ma, welatê ma xeyrin bo”. 2020î de zî cezaya faîlê qetlîamî Ahmet Turan Kiliçî hetê Erdoganî ra ameye efûkerdiş.
‘Rewşe ewro zî xirab a’

Murtaza Demîr qetlîamî ra weş xelisîya. Demîr vano, “Îqtîdar ewro zî xo rê qewetanê paramîlîteran awan keno. Ganî şar qetlîamê Madimakî ra derse bigero. Çira qerebalix ame pêser û wexto ke însanî vêşayêne, çira teber ra qîrayîşê şabîyayîşî berz bîyêne?. Ganî zîhnîyeto qetirkar weş bêro şinasnayîş.”

MA / ENQERA