Tîryakî: Tecrîd problemê 85 mîlyonî yo

pêncşem 14 îlonê 2023 - 16:41

Hakan YALÇIN / MA / ENQERA

Parlamenterê Partîya Çep a Keske Mehmet Ruştu Tîryakîyî dîyar kerd ke heta ke tecrîd meşikîyo meseleya Kurdan çareser nêbena.

Serekê PKKyî Abdullah Ocalanî ra 30 aşmî yo xebere nîna girewtene. Keyeyê ci û awiqatê ci nêşkenê ey reyde pêvînayîşan bikerê. Parlamenterê Partîya Çep a Keske yê Êlihî Mehmet Ruştu Tîryakîyî dîyar kerd ke heta ke tecrîdo sistematik meşikîyo sere de meseleya Kurdan û xeylê meseleye bînî çareser nêbenê.

 

‘Meseleya Kurdan bi şerî çareser nêbena’

Tîryakîyî va, “Îqtîdar tecrîdê Îmraliyî ramneno û wazeno meseleya Kurdan bi şer û şîdetî çareser bikero. Heta ke tecrîd dewam bikero polîtîkaya îqtîdarî zî nêbedilîyena. Şerêko pîl esto. Bi SÎHAyan, obusan, tankan û bi hezaran eskeran no şer yeno ramitene. Îqtîdar zano ke na mesele bin o qeyde çareser nêbena la reyna zî sîyasetê şerî de israr keno.”

 

‘Tecrîd problemê 85 mîlyonî yo’

Tîryakîyî bale ante wextê pêvînayîşan ser o û va, “Wexto ke Birêz Ocalanî de pêvînayîşî bîyêne, şaran nefesêk girewt. Derheqê çareserîye de hêvîyêk peyda bî. Seba ke şarî bieşkê bi hêvîye biewnê ameyoxî ra ganî tecrîd bêro şikitene. La nîya aseno ke AKP do warê şerî hîra bikero. Seba ke mabênê şaran de pênekerdişî peyda bibê polîtîkayêk yena ramitene. Nê pêroyî tecrîdî ra girêdayenê. Tecrîd problemê 85 mîlyonî yo. Tecrîd ke bişikîyo, meseleya ekonomîyî û xeylê meseleye bînî do çareser bibê.”

 

‘Ma do xoverdayîşêko cidî biramê’

Tiryakîyî dîyar kerd ke do seba şikitişê tecrîdî xeylê xebatî bêrê ramitene û va, “Ma weçînayîşan ra dima 600 merkezan de kombîyayîşî viraştê. Tewr zêde meseleya tecrîdî şarî qerqilnena. Şar wazeno vengê Birêz Ocalanî şoro înan û ci ra mesajêk pawenê. Şarê ma Ocalanî sey mefteyê çareserîye vîneno. Meseleyanê ma yê tewr muhîman ra yewe şikitişê tecrîdî yo. Ma na mesela ser o xeylê nîqaşî ramitê. Ma do no derheq de xeylê qeraran bigerê û şarî reyde înan bifênê kar. Seba şikitişê tecrîdî ma do xoverdayîşo cidî biramê.”

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.