Turkdogan: HDPyî bawerîya pê xo zêdînaye

çarşem 24 hezîranê 2020 - 12:02

  • Hemserekê ÎHDyî Ozturk Turkdoganî pare kerd ke HDPyî bawerîya pê xo newe kerde ke mîyanê teda û zorbazîye de zî eşkeno têkoşînê xo yê sîyasîyî meydanan de bikero.

Hemserekê Komeleya Heqanê Merdiman (ÎHD) Ozturk Tandoganî 'Rayraşîyayîşê Demokrasîyî yê vera Darbe' ANFyî reyde ercna û vist vîrî ke Tirkîya de wextêkê dergî ra nata meseleya qanûnê bingeyî esta. 

Tandoganî vat: ''Vera HDPyî prosesê janî de zî teda û hêrişê pîlî ameyî kerdene. Ganî demokrat û muxalîfan vera nê kerdişan nêrazîbîyayîşê xo bimojnayêne. La heyf o ke Tirkîya de HDPyî ra berî partîyêke çin a ke muxalefet bikera. 

Blokê îqtîdarî şerî ser o awan bîyo. Seba ke partîyê muxalîfî meseleya kurdan de bi hawayêkê eşkerayî vera şerî nêvejîyenê tim û tim pêşkarê îqtîdarî benê. Coka muxalefet bitesîr nîyo. Halbûkî weçînayîşê 2019î de AKP û MHP verê çiman de bin kewtî

Şar HDPyî ra zaf çîyan paweno. Nêzdîyê 10 hezar endam, îdarekar û weçînitoxê HDPyî tepişte yê. Tirkîya serra 2015î ra nata haştîye û ê çîyê bînî vîn kerdî. Meseleyê winasênî ganî oê rayîrê demokratîkî bêrê çareserkerdene, ganî şer bêro vindartene. 

HDPyî bawerîya pê xo newe kerde ke mîyanê teda û zorbazîye de zî eşkeno têkoşînê xo yê sîyasîyî meydanan de bikero. Ma neçare yê ke haştîye bîyarê nê cayî.''

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.