Vera tecrîdî Nobeta Edaletî: Beranê Îmraliyî akerê

Nobeta Edaletî de Pralamentera HDPyî yê Şirnexî Nuran Îmîre dîyar kerd ke, dişmenetîya Kurdan ver tecrîd yeno ramitene.

Nobeta Edaletî ya ke hetê parlamenteranê HDPyî ra seba ke tecrîd wedarîyo yena girewtene dewam kena. Parlamneterê HDPyî berê Dîkmenî yê meclîse de ameyê têhet û înan tîya de malûmatêk da.

Çalakîya nobete de Parlamentera HDPyî yê Şirnexî Nuran Îmîre qisey kerd û va, “Îttîfaqê AKP û MHPyî bi tecrîd û polîtîkayanê şerî wazeno kaosî pîl bikero. Ma vera nê polîtîkayanê nînan her ca de xo ver danê. Girawa Îmraliyî de hiqûqo taybet yeno ramitene. Ganî eşkera bibo ke, no hiqûqo taybet bingeyê xo ça ra û çi ra geno. Parlamenterî vanê ‘Îmrali de çi qewimîyeno, çira berî anêbenê?’ û Nobeta Edaletî genê. La çi heyf çi îqtîdarî ra veng nêvejîyeno.”

Binpaykerdişê hiqûqî û heqanê merdiman

Îmîre va, “Birêz Ocalan, bi komploya mîyannetewî kewt destê Tirkîya û o wext nat binê tecrîdî de yo. La bitaybetî par ra nat nêşkeno keyeyê xo û awiqatanê xo de pêvînayîşan bikero. Bi mehneyan heqê ci yê bingeyinî yenê binpaykerdiş. Ma hişyarîye kenê, ganî Wezaretîya Edaletî zîhnîyetê xo dîyar bikero. Eke nêşkena berpirsîyarî bigera, wa cayê xo terk bikerê. Ma zanê ke şima wazenê îqtîdarê xo bi polîtîkayanê şerî biramnê. Tecrîdê eynî wext de leteyê şerê taybetî yo. Şerî ver merdimi mirenê û feqîrî mîyan de yê. Îqtîdar hem hiqûqê zereyî hem hiqûqê mîyannetewîyî binpay keno.”

Dişmenetîya vera Kurdan

Îmîre dewamê qiseykerdişê xo de va, “Şima eşkenê vengê Birêz Ocalanî bi tecrîdî bibirnê la Birêz Ocalan eşkeno bi giranîya xo rewşa sîyasî bivurîno. Ma sey HDPyî tim vera şerî vindertê. Ma tim seba sîyasetê demokratîkî xo ver da. Polîtîkaya dişmenetîya Kurdan ra çiyêk nêvejîyeno. Îqtîdar ganî na polîtîka ra fek verado. Seba şikitişê tecrîdî çi ma dest ra yeno ma do bikerê. Serrêk de 300 uracatî hetê awiqatan ra ameyê kerdene la înan ra çîyêk nêvejîya. Qisawetî zêdêiyenê. Ganî berê Îmraliyî heyetêko xoserî rê bêrê akerdene. Ma Wezaretîya Edaletî rê gazîye kenê ke, ganî heyetêk bêro awankerdiş û berê Îmraliyî seba haştîye û çareserîye bêrê akerdene”

MA / ENQERA