‘Wa şaro kurd wayîrê rayberê xo vejîyo’

Sîyasetmedarê kurdî Hasan Basrî Firat û Abdullah Demîrbaşî derheqê tecrîdê vera Rayberê Şarê Kurdî Abdullah Ocalanî de tayê ercnayîşî kerdî û waşt ke şaro kurd wayîrê rayberê xo vejîyo.

Abdullah Demîrbaşî pare kerd ke babeta tecrîdî mesuldarîya CPTyî ya û vat: “Eke CPT biwazo bimojno ke dezgehêko cidî yo, neçare yo ke derheqê zîyaretê xo yê peyênî yê Îmralîyî de eşkerayîyêka cidî û qîme bido. CPT mesuldar o ke peynîya na rewşe bîyaro.

Dewleta tirke tecrîdî sey polîtîkaya şerî şuxilnena, nêverdena ke Birêz Ocalan fikranê xo rayaumûmîye de pare bikero. Tecrîd krîzê Rojhelatê Mîyanênî xorin keno û nêno qebulkerdene. Birêz Ocalan temînatê aştîye yo, aktorêko girîng o ke şarê kurdî goş dano ci. Tecrîdkerdişê Ocalanî tecrîdkerdişê şarê kurdî yo. Coka ganî cade tecrîd bêro wedaritene. Ganî şaro kurd, dostê înan û terefgîrê aştîye her ca de, her platform de nêrazîbîyayîşê xo yê demokratîkî bimojnê.”

Hasan Basrî ard ziwan ke tecrîd nîşaneya bêhuqûqîya vera kurdan a û vat: “Rayber Apoyî seba pawitişê heq û huqûqê kurdan xo ver da. Dewleta tirke seba ke destkewteyanê kurdan çin bikera huqûqê xo û krîteranê huqûqê globalî zî binpay kena. Sîyasetê vera Birêz Ocalanî nêno qebulkerdene.

Birêz Ocalan lîderê kurdan o. Verî dewletan lîderê kurdan ê sey Şêx Seîd, Seyîd Riza, Qazî Muhammed qetil kerdbî. Dewleta tirke zî wazena vera Birêz Ocalanî wina têbigêra. Şaro kurd ganî tarîxî ra dersan bigêro û wayîrê lîderê xo vejîyo. Ganî ma na polîtîkaya tecrîdî ya gemarine pûç bikerê. Şarê ma wa her şert û mercî de tecrîdî şermezar bikero.”

XWEBÛN