Îdareyê Xoserî Parlamentoya Ewrûpa de pêvînayîşî kerdê

Temsîlkarê Ewrûpa yê Îdareyê Xoserî yê Bakur û Rojhelatê Sûrîyeyî Ebdulkerîm Omerî, Fransa de Parlamentoya Ewrûpa de pêvînayîşî kerdê.

Seba ke krîzê Sûrîyeyî bi rayîranê demoktarîk û haştîyaneyan çereser bibo, Îdareyê Xoserî yê Bakûr û Rojhelatê Sûrîyeyî 18ê Nîsane 2023yî de bi 8 madeyan deklerasyonêk eşkera kerdibi. Pêro hêzan rê gazîye amebî kerdene ke wa berpirsîyarîya xo biyarê ca. Temsîlkararanê Îdareyê Xoserî, Fransa de Parlamentoya Ewrûpa de pêvînayîşî kerdê.

Temsîlkarê Îdareyê Xoserî Ebdulkerîm Omerî, parlamenteranê Ewrûpayî yê Alfonsi Francois, Catherina Langen Sieban, Fabio Castaldo, Javier Nart, Ilan Debasco û Marisa Matiase reyde ame têhet.

Vernîya çareserî de astengîyî estê

Ebdulkerîm Omerî derheqê pêvînayîşan de ANHAyî rê erjnayîşî kerdê. Ey dîyar kerd ke seba çareserîya krîzê Sûrîyeyî kedê sîyasî yê Ewrûpa û hêzanê mîyanneteweyîyan muhîm ê. Omerî va, “Rejîmê Sûrîyeyî wazeno şertî reyna bibê sey verê 2021î û hêzê muxalîfî zî girêdayîyê teberî yê. Coka kedê çareserîye yenê astengkerdene.”

Ganî beşdarê xebatanê çareserîye bibo

Parlamenteranê Ewrûpayî va, “Ma zanê ke mintiqaya Îdareyê Xoserî de xeylê şar û bawerîyan ra bi mîlyonan kesî cuwîyenê. Coka ganî temsîlkarê Îdareyê Xoserî beşdarê pêro kombîyayîşan bibê. Eke nîya mebo do heqê meşrûyî meyerê ca û çareserîye do meyera awankerdene. Pêşnîyazê çareserîye yê Îdareyê Xoserî do dejanê merdiman kêmî bikero. Ma bawer kenê ke do komelo mîyannetewî berpirsîyarîya biyaro ca û paştî bido Îdareyê xoserî.”

Parlamenteran bale ante mehkemakerdişê endamanê DAÎŞî zî ser o û înan dîyar kerd ke na mesela raşta zî muhîm a. Parlamenteran gazîye kerde ke wa pêro welatî welatîyanê xo bigerê û reyna hêzanê mîyanneteweyîyan rê gazîye ameye kerdene ke seba ke Îdareyo Xoser bieşko edeletî awan bikero ganî paştî bidîyo ci.

MERKEZÊ XEBERAN