Hemsereka Enstîtuya Kurdî ya Swîsreyî Fatma Şike dîyar kerd ke aşma Êlule ra têpîya Kurdkî do kantonê Cenevre de bibo dersa weçînitîye.
Bajarê Lozanî yê Swîsreyî de bi wesîleya 15ê Gulane Roşanê Ziwanê Kurdkî panelêk ame viraştene. Moderatorîya panelî hetê nuştox Mursel Yildizî ra ameye kerdene. Hemsereka Enstîtuya Kurdî ya Swîsreyî Fatma Şik û ronayoxanê enstîtu ra nuştox Gernas Koçer pêşkêşîyî kerdê.
‘Ganî her kes seba ziwanê dayîke têbigêro’
Gernas Koçerî qiseykerdişê xo de va, “Kurdistan, Tirkîya û Ewrûpa de Kurdî ziwanê xo yê qedîmî ra kewenê dûrî. Ganî Kurdî derûdorê xo de û keyeyanê xo de wayîrê ziwanî bivejîyê. Medenîyetê sey Asûr, Babîl û Hîtîtî tarîx ra pak bîyê. Dişmenî polîtîkayanê asîmîlasyonî berz kenê û netîce de domanê Kurdî ziwanê xo ra dûrî kewenê. Kurdî, na rewşe de seba ke wayîrê ziwanê xo bivejîyê ganî xoverdayîşêko pîl bidê.”
‘Kurdkî do sey dersa weçînitîye bêro dayene’
Hemsereka Enstîtuya Kurdî ya Swîsreyî Fatma Şike dîyar kerd ke Kurdkî do çend bajaran de sey dersa weçînitîye bêro dayene û va, “Seba ke Kurdkî xeylê merkezan de sey dersa weçînitîye bêro dayene ma xebatê xo ramitê. Kantonê Cenevreyî de emser do aşma Êlule ra têpîya Kurdkî do sey dersa weçînatîye ca bêro dayene. Seba ke pêro Swîsre ra derse vila biba ma xebatanê xo ramnenê.”
‘Ma ganî vera asîmîlasyonî ziwanê xo bipawê’
Şike peynîya qiseykerdişê xo de va, “Muqaveleyê Lozanî kewena serra 100ine. Bi nê muqaveleyî Kurdistan bîyo 4 lete û bi polîtîkayanê ‘tek milet, tek ziwan û tek beyraqe’ şarî ziwan, kultur û nasnameyê xo ra dûrî kewtê. Ma ganî vera nê polîtîkayanê asîmîlasyonî ziwanê xo yê dayîke bipawê.”
Qiseykerdişan ra dima persî ameyê perskerdiş û çalakî goştarîkerdişê deyîran qedîyaye.
MA / LOZAN
parvê bike
Nûçeyên ku dikare bala we bikşîne
