LÊL AMED
Tarîxê kurdan de zaf mesele ameyî cuyayiş û nê meseleyê zî taybetî vera zilm û zordarî ameyî cuyayiş. Nê hîkayeyan ra yew zî Zembilfroş a, çimkî Zembilfroş zî sey Kawayo Asînkar vera zengînîyê Dinya, azadîya şarê xo pawita. Nê rojê zehmetî de ganî kurdan Zînî Wertê de haydar bibî û nîrê kayê dişmenê kurdan. Yewîyeya kurdan zî encax bi verê zevk û safayê Dinya azadîya şarê kurd pawitişî reyde bena.
Hîkayeya Zemfroş, qezaya Ferqînê Amedî de yena cuyayiş û hîkaye wina ya; Zembilfiroş lajê zaf zengînêk û ciwanêk zî zaf keleş bî. Sey her lajê zengînî, o zî seydwanî û kêfweşî ra zaf heskerdinî. Ta ke rojêk goristanî ra demê vîyartişî ra û na roje dinyaya zerrîya ci bedilyena.
Demê vîyartişê goristanî de cuya û merg yewbînan reyde qiyas keno la no kiyaskerdişêko nasaye nêyo, yew het de wayîrbîyayişê mal, mik, zevk û sefayî û yew het ra zî nêbîyayişê nê çikan, netîceyê di cuyaya bi ferq de yew çarenuşt; merg yanî dinyabedilnayiş!
Belê Zembilfroş senî dinyaya bibedilnaynî? Zengîn ya zî feqîr ya zî seba pawitiş û xeliskerdişê şarê xo bi têkoşîndayişî. Na roje ra pey êdî her çik sey verin nêbî seba Zembilfroşî. Zembilfroş her çik peynîya xo de veradano, doman û cenîya xo gêno û saltanîyî ra fek veradano. Zembilfroş êdî debara xo dew bi dew, bajar bi bajar bi rotişê zembilî keno. Seba ke zembil roşeno nameyê ci beno ‘Zembilfroş’.
Rojêk demê rotişê zembilî, cenîya Ferqîn Begî, Xatûn; Zembilfroş dîyena û eşîqê Zembilfroşî bena. Bi baxaneyê girewtişê zembilî, Zembilfroş dawetê saraye kena û Xatûn bi şîîre Zembilfroşî ra eşqê xo aşkera kena. Zembilfroş soz dayo xo ra û tovbe kerdo. Êdî zevk û sefayî ra fek veradayo û seba xelisyayişê şarê xo do têkoşîn bido, semedê ci eşq zî bibo.
Îdealê xo ser Zembilfroş, teklîfê Xatûne red keno, çimkî o nîmetê Dinya ra fek veradayo sey dervîşêkî. Êdî mabenê şarê xo de sey mîlîtanêk o, Zembilfroş zewejnaye bî, doman û cenîya ci estbîyê. Demo ke Zembilfroş teklîfê Xatûne, qebul nêkeno. Xatûn qerar dana ke cenîya Zembilfroş reyde pêvînayişêk bika.
Xatûn şona, cenîya Zembilfroşî reyde qise kena. Cenîya Zembilfroşî vera tay zerrên teklîfê Xatûne qebul kena ke Xatûn şan de pista Zembilfroşî ra bikewa. Zembilfroş saetê şanî de yeno keye û seba ke betilyayo bi raştî şono cila xo. Demo ke keweno cile, dîqetê ci anceno ke lingê cenîye de xirxal esto. Bi lezî vardano cile ra û dûr keweno, çimkî zaneno xirxal tena malbatê Ferqîn Begî de cenî û kêna ser xo kenê. Na roje ra nika çew Zembilfroşî ra agahî nêgirewto. Her kes no hedîse hesîyeno, cenîya Ferqîn Begî, Xatûn zanena ke eşqî ay, eşqê laşî nîyo sey eşqê roşnî yo. No ser xo Xatûn dêsê saraye ra xo erzena war û xokişena.
