DEM Partî mektubî nuştê û erşawitê UNESCO

• Hemserekanê DEM Partî Tuncer Bakirhan û Tulay Hatîmogûllari bi waştişê “Ma bi ziwanê dayîke perwerde wazenê” bi 6 ziwanan mektubî nuştê û erşawitê UNESCO.

Hemsereknanê DEM Partî Tuncer Bakirhan û Tulay Hatîmogûllari bi wesîleya Roja Ziwanê Dayîke ya Dinya bi 6 ziwanan mektubî nuştê û erşawitê UNESCO. Mektubî, bi lehçeyanê Kurdkî yê Kurmanckî û Kirmanckî, Erebkî, Armenîkî, Sûryankî, Îngîlîzkî û bi Tirkî ameyê nuştene. Ame vatene ke, “Nê erdî ser de Tirkî ra teber pêro ziwanî bi sîstematîk yenê asîmîlekerdene û qedexekerdene. Polîtîkayanê asîmîlasyonî ver xeylê ziwanê kewtê binê talukeyê çinbîyayîşî. Goreyê xerîteya ziwanî ya UNESCOyî heta ewro Tirkîya de 18 ziwanî çin bîyê yan zî binê talukeyê çinbîyayîşî de yê. Înan ra yew zî lehçeyanê Kurdkî ra Kirmanckî ya.”
 
‘Ma perwerdeyê bi ziwanê dayîke wazenê’
Mektuban de ame vatene ke, “Heqê perwerdeyê bi ziwanê dayîke hetê Neteweyanê Yewbîyayeyan ra bi resmî ameyo qebûlkerdiş û endamanê NYyî rê ameyo ferzkerdene. La no heqo bingeyî Tirkîya de seba Kurd, Ereb, Armenî, Sûrayanî, Çerkes û Lazan ameyo xesbkerdiş. Tirkîya de Tirkî ta teber pêro ziwanî bi sîstematîk ameyê asîmîlekerdene û qedexekerdene. Goreyê xerîteya UNESCOyî heta ewro Tirkîya de 18 ziwanî çin bîyê yan zî binê talukeyê çinbîyayîşî de yê. Nê ziwanan ra yew zî lehçeyanê Kurdkî ra Kirmanckî ya. 
 
Asîmîlasyonê ziwanan û qirkerdişo kulturî kewenê mîyanê sucanê vera merdimîye. Tirkîya qeraranê mîyanneteweyîyan ca nêana û heqanê bingeyîyan binpay kena. Mas ey DEM Partî bi wesîleya 21ê Sibate Roja Ziwanê Dayîke ya Dinya sazîya şima û sazîyanê mîyanneteweyîyan rê gazîya berpirsîyarîye kenê. Ma wazenê ke heyetêk bierşawê Tirkîya û wa derheqê binpaykerdişanê heqê ziwanî de cipersayîşêk bidîyo dest pêkerdene. Ganî Tirkîya de statuyê Kurdkî (Kurmanckî, Kirmanckî), Erebkî, Armenîkî, Sûryankî, Çerkeskî, Lazkî, Romankî, Boşnakkî û ziwananê bînan bêro qebûlkerdene. Ma wazanê ke wa Tirkîya goreyê muqaveleyanê mîyanneteweyîyan têbigêra û wa qeraran biyara ca.
 
Tirkîya ganî madeyanê 17., 29. û 30. yê Muqaveleyê Heqanê Domanan ê Neteweyanê Yewbîyayeyan ser ra şerhê xo bianca û seba ke qeraranê muqaveleyî biyara ca zî ganî sazîya şima berpirsîyarîya xo biyara ca. 
Ma sey DEM Partî 21ê Sibate Roja Ziwanê Dayîke ya Dinya pîroz kenê.” MA / ENQERA