- Hemserekê Komeleya Edebîyatkaranê Kurdan Rêdûr Dîjleyî dîyar kerd ke seba ke Kurdkî bibo ziwanê perwerdeyî ganî xoverdayîş bêro pîlkerdene.
Tirkîya de netîceya polîtîkaya tekziwanî de xeylê ziwanî binê talukeyî de yê. Vera Kurdkî zî polîtîkayê asîmîlasyonî bêmabên dewam kenê. Hemserekê Komeleya Edebîyatkaranê Kurdan Rêdûr dîjleyî bi wesîleya Roja Ziwanê Dayike ya Dinya derheqê muhîmîya ziwanê dayike de erjnayîşî kerdê.
‘Ziwan estbîyayîşo nasnameyî yo’
Dîjleyî dîyar kerd ke ziwan estbîyayîşo zaf qîmetin o û va, “No estbîyayîş xo de hîs, fikir û estetîkê komelî kirişneno. Ziwan estbîyayîşo nasnameyî yo. Komel, bi nê estbîyayîşo nasnameyî cuya xo vîyarneno. Asta ziwanî asta cuya komelî dîyar kena. Eke asta ziwanî berz nêbo, mîyanê wextî de raştê asîmîlasyonî yeno.”
‘Qirkerdişo kulturî’
Dîjleyî va, “Bi qirkerdişê kulturî, astengîyî kewenê mabenê fikir û kodanê ziwanî. Ziwano xerîb ziwano kolonyal o. Ma ganî ziwan û nasnameyê xo mîyan de têkilîyêka raşte ronê. Eke Kurdî wazenê bi raştîya xo bicuwîyê ganî ziwanê xo her warê cuye de bigurînê û bi ziwanê xo binusê û biwanê. Eke nîya nêbo, na nêbena cuya ma.”
Dîjleyî dîyar kerd ke tîyatro û konseri yenê qedexxekerdiş û va, “Wazenê fikir û estetîkê Kurdan çin bikerê. Ma sey Komeleya Edebîyatkaranê Kurdan wazenê nê fikir, ruh û estetîkî bi raya edebîyatî peyda bikerê. Ma bi nê armancî kede danê. Roja Ziwanê Dayike senî ke seba pêro şaran muhîm a, seba Kurdan zî rojêka zaf muhîm a. Seba ke Kurdkî bibo ziwano resmî û ziwanê perwerdeyî ganî xoverdayîş bêro pîlkerdene. Ganî raya pêroyîye ya Kurdan zî bi nê xesasîyetî têbigêra.”MA / AMED
