Teyra azadîya Kurdistanî: Leyla Qasim

• Leyla Qasim 12ê Gulane 1974î de çar embazanê xo reyde ameye dardekerdiş.

Leyla Qasim 12ê Gulane 1974î de çar embazanê xo reyde ameye dardekerdiş.

48 serrî verî cû 12ê Gulane de Leyla Qasim fikranê xo yê sîyasîyan ver ameye dardekerdiş. Rejîmê Baasî waşt vere xoverdayîşê cinîyanê Kurdan bigero. Leyla Qasim a xoverdayoxe 1952yî de dewa Bamîlî ya Xaneqînî de ameye dinya. Keyeyê aye dima koçê Bexdatî kerd. Leyla beşa komelnasîye qezenc kerde. Leyla 20 serrîya xo de Yewîtîya Wendekaranê Kurdistanî nas kerde. Aye tîya de dişmenetîya vera Kurdan a Sedam Huseyînî ser o nuşteyêk nuşt û bîye hedefê rejîmî.

‘Cinîyî nêşkenê karanê camêrdan bikerê’

Ê serran de xebatê wendekaran zêdîyaybî û koyan de zî şero çekdarî dest pêkerdibi. Leyla dî ke camêrdî vanê cinî û camêrdî cîya yê, cinîyî nêşkenê xebatanê şorişgeraneyan bikerê. La Leyla eqsê ci xebatê xo zêdînayê û beşdarê xebatanê sîyasîyan bîye. 24ê Nîsane 1974î de bi çar embazanê xo ya ameye girewtene. Raştê îşkenceyanê giranan ameye la reyna zî nêkewte. Leyla Qasim înan ra vatibî, “Mi bikişê, la naye zî bizanê ke bi mergê mi do bi hezaran Kurdî hewnê giranî ra hişyar bê. Ez xeylê keyfweş û sereberz a ke ez ganê xo fedayê xelasîya Kurdistanî kena.”

‘Ez bena veyva Kurdistanî’

Rojêk verê dardekerdişê ci, maye û waya Leyla şinê aye het. Leyla vana, “Porê mi ra qevdêk por biqesnê û kincanê mi wedarê. Wexto ke Kurdistan bi azad, ez do porê xo derg bikerî û kincanê xo yê rindekan bida xo ra û ez do biba veyva Kurdistanî.” 12ê Gulane 1974î de Leyla Qasim û çar embazê aye hetê rejîmê Baasî ra ameyê dardekerdiş. Leyla Qasim bîye teyra azadîya Kurdistanî û a timûtim ezmanê Kurdistanî neqişnena.

Şaîr Hêmin Mukrîyanî aye ser o şîîrêk nuşte û şîîra xo de vano:

“Zordarî hinî nêgêrena
Leyla bicuwîya, se reye aferîn
Ma rê bîya bawerî û dîn
Reyna mi de peyda bîyê birînî
Kezeba mi debîya bi gonî”

MERKEZÊ XEBERAN