Çalakîya ‘Abdullah Ocalanî rê azadîye’ ya Cenevreyî 3 serrê xo qedînayê

Çalakîya ke her Çarşeme bi waştişê ‘Abdullah Ocalanî rê azadîye’ Cenevre de yena kerdene 3 serrê xo qedînayê.

Bajarê Swîsreyî yê Cenevreyî de 3 serrî yo vernîya ofîsê NYyî de bi waştişê ‘Abdullah Ocalanî rê azadîye’ çalakîye yena kerdene. Bi wesîleya serra 4ine ya çalakîye rayîrşîyayîş ame kerdene. Xeylê Kurdistanijî û dostê înan bîyê beşdarê rayîrşîyayîşî.

‘Emser do biba serra azadîye’

Verê rayîrşîyayîşî eşkerayîye ameye kerdene. Hemsereka CDK-Syî Semra Surere qisey kerd û va, “Çalakîya ‘Dem dema azadîyê’ 3 serrê xo qwedînayê û kewte serra xo ya 4ine. Ma do na serre bikerê serra azadîya Rayber Apoyî. Hêvîya ma şarê ma û dostane m ara est a. Ma do azadîya rayberîya xo rê wayîr bivejîye û ma do rayberîya xo azad bikerê.”

NYyî rê gazîye

Dîwanê Hemserekîya KCDK-Eyî ra Mehmet Aslanî NYyî û dewletanê dinya rê gazîye kerde û va, “Kurdî tena seba xo mucadele nêkenê. Vera DAÎŞî zî mucadele kenê û dinya xirabîya înan ra pawenê. Xoverdayîşê Rojawanî verê çimanê pêro dinya de ame dayene. Eke ewro Ewrûpa belayê DAÎŞî ra dûrî ya, no bi saya Kurdan bîyo. No xoverdayîş seba pêro bindestan ameyo dayene. Eke Kurdî ewro seba pêro dinya xover danê, ganî NY û dewletê Ewrûpa zî seba azadîya şarê Kurdî berpirsîyarîye bigerê xo ser û seba ke Kurdî birasê heqanê xo têbigêrê.”

MERKEZÊ XEBERAN