‘Heta ke Abdullah Ocalan azad mebo mesele çareser nêbena’

MA / Mehmet GULEŞ – Bazîd EVREN / AMED

Hemserekê MED-DERî Remzî Azîzoglûyî va, “Heta ke Abdullah Ocalan azad mebo ne meseleya Kurdan ne zî meseleyê Rojhelatê Mîyanênî çareser nêbenê.”

29ê Teşrîna Verêne de Amed de hetê 200 sazîyan ra seba ke tecrîd bêro wedartene û meseleya Kurdan bi rayanê demokratîkan bêra çareserkerdene deklarasyonêk ame parekerdene. Îmzakaranê deklarasyonî ra Hemserekê MED-DERî Remzî Azîzoglûyî tecrîdî û kampanyaya ‘Abdullah Ocalanî rê azadî, meseleya Kurdan rê çareserî’ erjnayê.

‘Mîlyonan îradeyê xo beyan kerd’

Azîzoglûyî dîyar kerd ke mîlyonan Abdullah Ocalanî îradeyê xo dîyo û va, “Eke wazenê meseleya Kurdan çereser bikerê ganî verî ey de pêvînayîş bikerê. 34 aşmî yo xebere nîna girewtene û şar qisawetan keno. CPT vano mi pêvînayîş kerdo la malumat nêdano. Hiqûqo mîyanneteweyî yeno binpaykerdene. Hiqûqî seba feydeyê xo gurînenê. Eke nîya mebîyêne, tecrîdî hende derg nêkerdêne.”

‘Paradîgmaya ey dinya ra vila bîye’

Azîzogluyî va, “Sîstem Kurdan têduşt nêvîneno û weçîniteyan û îdarekaran zî qebul nêkeno. Paradîgmaya Abdullah Ocalanî dinya ra vila bîya û xeylê welatan de yena nîqaşkerdene. Ocalan ke azad bo, paradigmaya ci bi asanî kewena kar. Şerî qedîyenê û şarî pêro pîya xo îdare kenê. Heta ke Abdullah Ocalan azad mebo ne meseleya Kurdan ne zî meseleyê Rojhelatê Mîyanênî çareser nêbenê. Seba çareserîya meseleyan Ocalan pêznîyazanê çareserî zî keno.”

‘Ganî çalakîyî komelî mîyan de vila bibê’

Azîzoglûyî peynî de va, “Ganî Abdullah Ocalan azad bibo. Çalakîya greve vêşanîye ya ke seba azadîya Ocalanî hepisxaneyan de yena kerdene dewam kena. Dayîkî Nobeta Edaletî de yê. Bi çend kes û keyeyan netîna nîna girewtene. Ganî çalakîyî komelî mîyan de vila bibê.”