- Parlamentoya Katalonya îtîbarê cinîyanê ke se serran ra ver bi îdîaya ‘cazûtîye’ ameybî qetilkerdiş têpîya da înan.
Parlamentoya Katalonya îtîbarê cinîyanê ke se serran ra ver bi îdîaya ‘cazûtîye’ ameybî qetilkerdiş têpîya da înan.
No qerar bi paştîdayîşê kovara Sapiensî ame dyene. Bi nê qerarî îtîbarê nêzdîyê 1000 cinîyan têpîya ame dayene. Goreyê malûmatan, no qerar badê fikranê tarîxnasan û qeraranê sey welatanê Scotland, Swêd û Norwayî ame girewtiş. Tarîxnasan nasnameyanênê cinîyan eşkera kerdibî.
Ma verî ‘cazûye’ bî nika zî ‘femînazî’ yê
Wekîla cinîya parlamentoya Katalonyaye Jenn Dîaz va, “Ma verî cazûye bî nika zî ma ra vanê femînazî, histerik û hetê cînsî ra nêweş. Verî înan seydê cazûyan kerdêne û nika zî ma nê hedîseyan ra vanê qetilkerdişê cinîyan.”
50 hezar kesî ameyê qetilkerdiş
Ewrûpa de mabeyne 1580 û 1630î de 50 hezar kesî bi sucê cazûtîye ameyê sucdarkerdiş û qetil bîyê. Se ra 80î yê nê kesan cinîyî bî. Seydê cazûyan hîna zaf welatanê Bakurê Ewrûpayî de bîyo. Goreyê tarîxnasan Katalonya seba Îspanya îstîsnayêk o û seydê tewr verînî tîya de dest pêkerdê. Seydê cazûyan heta seserra 18ine dewam kerdo û yeno zanayene ke tîya de 1424î de verba cazûyan qanûno verên vejîyayo. Nê qerarî hetê mehkemeyanê Engîzîsyonî ra ameyêne girewtene û ca ardene.
BARCELONA
