MA / Eylem AKDAG – Mujdat CAN / AMED
Temsîlkara Sinn Feinî ya Ewrûpa Martina Andersone dîyar kerd ke fikre Abdullah Ocalanî îlham danê xeylê kesan.
Hereketê Cinîyan ê Azadan (TJA), mabênê 13-14î de Amed de konseransêko mîyanneteweyî viraşt. Kargehî ameyê viraştene û derheqê meseleyanê girewteyan de pêznîyazî ameyê parekerdene. Temsîlkara Sinn Feinî ya Ewrûpa Martina Andersone derheqê xoverdayîşê cinîyanê Kurdan û tecrîdî de erjnayîşî kerdê.
Andersone dîyar kerd ke konferans zaf muhîm bi û ganî organîzasyonê nîyanênî hîna zêde bêrê viraştene. Aye va, “Tena qiseykerdiş û tîya ra şîyayîş nêbeno. Ganî planêko stratejîk bêro kerdene ke ma bieşkê nê xebatanê xo dewam bikerê. Seba ney zî ma ganî kampanyayêk biramnê. Ma ganî rayîran peyda bikerê ke bieşkê hîna zêde bêrê têhet.”
‘Tedayê ke ma rê bîyê eynî yê’
Andersone dîyar kerd ke xoverdayîşê cinîyanê Kurdan û xoverdayîşê cinîyanê Îrlandayî manenê yewbînî û va, “Kurdî zî bi serran ra nata xover danê. Sîyatmedarê Îrlandaya Bakûre Bobby Sands zî bi serran hepis de mend. O zî kewt greva vêşanîye û dima kewt parlamento û bi parlamenter. Sîyasetmedarê Kurdan zî eynî nîya xover danê. Sîyasetmedarî erzîyenê hepsan.”
Andersone dîyar kerd ke şarê Kurdî û şarê Îrlandayî rê eynî tedayî benê û va, “Ma fam kenê ke Kurdan rê çi tedayî yenê kerdene. Îngîltereyî wextê şerî de sîyasetmedarî ma kuçeyan de kiştê. Xeylê endamê partîya ma kuçeyan de ameyê kiştene. Parlamentoya Ewrûpa de, parlamenterê ke heqê merdiman xo rê kenê derd zaf kêmî yê. Zafe înan rastgir û Erdoganî de têkilîya înan baş a. Çunku Erdogan seba ke multecîyan Tirkîya de bitepişo înan reyde peymanê ci est o.”
‘Fikrê Ocalanî îlham danê’
Andersone bale ante tecrîdî ser o û fikranê Serekê PKKyî Abdullah Ocalanî ser o û va, “ Xeylê serrî yo ke hepisxane de yo û binê tecrîdî de yo la fikrê ci aver ê û îlham danê xeylê kesan. No sebeb ra zî paytextê Îrlandayî de dêsêkî ra postere Abdullah Ocalanî est o.”
parvê bike
Nûçeyên ku dikare bala we bikşîne
