Bi wesleya 25ê Teşrîna Peyêne Roja Têkoşînê Vera Şîdetê Serê Cinîyan vizêr Dêrsim de bi sernameyê ‘Şîdetê Camêrd-Dewlete, Heqê Ma û Têkoşîn’ panel ame kerdene.
Cinîyanê Dêrsimî derheqê şîdetê camêrd-dewlete de panelêk kerd û seba têkoşînî veng da.
Îdarekara DADî Fethiye Yildirime vat seba ke verê şîdetê serê cinîyan bêro girewtene ganî zîhnîyet bêro bedilnayene û bedilnayîşê zîhnîyetî zî keye de dest pêkeno.
Parlamentera HEDEPî ya Dêrsimî Ayten Kordu zî nê vatî: “Îqtîdarê AKP-MHPyî 21 serrî yo faşîzmê xo kerdo mende. Zaf metodê cîya cîyayî yê şîdetî est ê. Camêrd û dewlete eynî polîtîkayan rayra benê. Tirkîya de qirkerdişê cinîyan est o. Dêrsim de polîtîkayê şerê taybetî yenê rayraberdene. Herêma ma de şîdetê vera cinîyan bi polîtîkayanê şerê taybetî yeno averberdene.
Gulîstan Doku kotî de ya? Na hadîse bi xo polîtîkaya şerê taybetî ya. Wendekarê Unîversîteya Munzurî raştê ajanîye û polîtîkaya leymine yenê. Nê bajarî de tecrîdêk est o. Tecrîdo ke Îmrali de dîya destpêkerdene heme komelî rê, cinîyan rê vila beno. Înşakerdişê yew komelî bi destê cinîyan beno. Ma do peyser game meerzê, ma her ca de yê, ma do her ca de bê. Seba ke ma kurd û elewî yê ma zafêr raştê şîdetî yenê. Coka ganî ma vera şîdetê camêrd-dewlete têkoşînî xurtêr bikerê.”
Badê qiseykerdişan persê goşdayoxan ameyî cewabkerdene. Panel bi goştarîkerdişê muzîkî qedîya.
XWEBÛN
