- Vervatoxa Meclîsê Cinîyan ê HDPyî Ayşe Acar Başaran bala ante hêrişanê vera cinîyan ser û vat: ''Ma pîya îqtîdarî ra hesab bipersê.'' Başarane vat: ''Hêrişê cînsî yê Kurdîstanî polîtîkayê şerê taybetî yê.''
Vervatoxa Meclîsê Cinîyan ê HDPyî Ayşe Acar Başaran Merkezê Pêroyî yê HDPyî de kombîyayîşêkê çapemenîye kerd û rojdem ercna.
Qiseykerdişê Başarane ra beşêk wina yo:
''Ma sey cinîyanê HDPyî do nêverdê ke têkoşînê cinîyan bêro astengkerdene. Wextanê peyênan de şîdet û hêrişê cînsîyî yê vera cinîyan zêdîyayî. Ma zanenê ke bi taybetî hêrişê cînsîyî yê Kurdîstanî metodêkê şerê taybetî yo.
Şirnex de çawişêkî domanêka 13 serre tacîz kerde la walîtîya Şirnexî hêriş mîyan kerd. Êlih de çawişêkê pisporî tecawuzê cinîyêka 18 serre kerd. 20 rojan na cinîye esîr kerde û ci rê teda kerde. Cinîye zî xîret kerd ke xo bikişa. Ma keyeyê cinîye de qisey kerd; rewşa aye hema zî giran a. Çawişo pispor zî serbest o. Nê pêro mojnenê ke nê hêrişî metodê şerê taybetî yê. Ma zanenê ke çira embazêka ma ya 70 serre tepişîyaye, Gulîstane Doku çira 200 rojan ra nata nêna dîyene, û vera embazanê ma yê Komeleya Roza û TJA çira hêriş yeno kerdene. Mesaj danê vanê ke 'Eke şima vera şîdetê cinîyan têkoşîn bikerê ma do verê şima bigêrê.' La rizmê naye zî têkoşînê ma dewam keno.
Menga hezîrane de 27 cinîyî kişîyayî, 23 cinîyî bi hawayêkê şikdarî merdî. Wextê îqtîdarê AKPyî de 3 hezar û 45 cinîyî merdî. Nê qirkerdişî dewam kenê. La AKP-MHP hema zî rexneyê xo nêdayo. Reyna cînayetê Pinare Gultekîn de zî têna îqtîdar mesele şermezar kerde.
Coka ma perey pêro cinîyanê Tirkîya reyde meydanan de, Meclîs de vengê xo berz kerd. Ma do bibê vengê Pinare û Fatma Altinmakas. Fatma dadîya 6 domanan bîye û digane bîye. Kiştoxê aye zî ho teber de yo
Peymana Îstanbulî netîceya keda cinîyan a. Ma do nêverdê ke îqtîdar destkewteyanê ma, ma destî ra bigêro. Pawitoxê ma destkewteyê ma yê, rêxistinbîyayîşê ma yê. Tehamulê ma nêmendo ke cinîyêke zî ma ra kêm biba.
Ez reyna tîya ra venga cinîyan dana ke bêrê ma pîya meydanan de, Meclîs de têkoşîn bikerê. Ma vera camêrdan û sîstemê serdestîya camêrdan cuyêka azade awan bikerê. Ma nameyê cinîyanê ke ameyî qetilkerdene ser o îqtîdarî ra pîya hesab bipersê.
Ma 8ê hezîrane de dest pê kampanyaya 'Têkoşînê Cinîyan her ca de yo' kerd. Ma 25ê temmuze de Kugulu Parka Anqara de fînalê kampanya do bikerê. Ez tîya ra venga pêro cinîyan dana ke bêrê ma vera şîdetî pîya têkoşîn bikerê, ma a roje bêrê pêser.''
ANF
