Serrgêra komploye de do 74 welatan de çalakîyî bêrê kerdene

Hemsereka KCKD-Eyî Zubeyde Zumrute dîyar kerd ke do serrgêra komploya mîyanneteweyî de vernîya Konseyê Ewrûpayî de nobete bidîya dest pêkerdene.

Serrgêra komploya mîyanneteweyî ya 9ê Teşrîna Verêne nêzdî bena û hedreyîyê çalakîyan yenê kerdene. Hemsereka KCKD-Eyî Zubeyde Zumrute JINNEWSî rê qisey kerd û dîyar kerd ke do 10ê Teşrîna Verêne de vernîya Konseyê Ewrûpayî de nobete dest pêbikera û 74 welatan de çalakîyî bêrê kerdene.

‘Do hemleyêk bidîyo dest pêkerdene’

Zumrete va, “Na serre zî seba ma serrêka tarîxî ya. 2 serre û nêmî yo ke Girawa Îmraliyî de çi qewimîyeno xebera şarî çin a. Serrgêra komploye de do xeylê çalakîyê pîlî do bêrê kerdene. Emser do Ewrûpa de bi rayberîya cinîyan rayîrşîyayîşî bêrê kerdene. Qey beşdarîye û wayîrvejîyayîşî ganî ma rolê xo yê tarîxîyî biyarê ca. Çunke emser do seba azadîya rayberî hemleyêk bidîyo dest pêkerdene.”

74 welatî de çalakîyî

Zumrute dîyar kerd ke ganî seba azadîya Abdullah Ocalanî meydanan de xoverdayîşî bêrê kerdene û va, “Seba ney zî cayê xoverdayîşî meydanî, kuçeyî û beşarîyê girseyî yê. Qey çalakîyan pêro rêxistinîyê ma seferber bîyê. Rayîrşîyayîşî û mitîngî do bêrê kerdene. Seba azadîya rayberî do hemleyêk bidîyo dest pêkerdene. Ma startê nê hemleyî do 10ê Teşrîna Verêne de Strasburgî de bidê. Rayberî emser keweno serra xo ya 74ine û ma do 74 cayan de çalakîyan bikerê.”

Vernîya Konseyê Ewrûpayî de çalakî

Zumrete dîyar kerd ke ê do 10ê Teşrîna Verêne de Strasburg de vernîya Konseyê Ewrûpayî de bi 500 kesan nobete bidê dest pêkerdene û va, “Çalakî do 4 rojî dewam bikera. A roje xora Konseyê Ewrûpayî de xebatî do bibê û ma do vajê ‘mebê şerîkê sûco ke Tirkîya de yeno kerdene û şima nêşkenê tekilîya rayberî û Kurdan biqerifnê’. Çimê dinya do uca ser o bê û ma do bi sazîyanê xo û şarê xo rayberî azad bikerê.”

MERKEZÊ XEBERAN