Şorişê Rojavayî çirûskîyeno

• Profesoro Swêdij Stellan Vinthagenî va: Şorişê Rojavayî çirûskîyeno!

CÎHAN BÎLGÎN / ANHA

Profesoro Swêdij Stellan Vinthagenî va, “Rejîmê otorîterî her cayê dinya de xurt benê. Myanê na rewşa xirabe de Şorişê Rojavayî çirûskîyeno û ters dano xeylê dewletan.”

Şorişê Rojavayî 10 serrê xo qedînayê. Gef û hêrîşanê Tirkîya ver, demêk verî cû hetê Îdareyê Xoserî yê Bakur û Rojhelatê Sûrîyeyî ra rewşa awarte ameybî îlankerdiş. Şar serrgêra şorişî de wayîrê xoverdayîşî vejîyeno û bi bawerîya pîle şorişî pîroz keno.

Mîyanê 10 serranê şorişî de xeylê nuştox, sîyasetmedar û akademîsyanan paştî da şorişî. Nê paştîdayoxan ra yew zî Profesor Stellan Vinthagen o. Profesor Vinthagenî serrgêra şorişî de qisey kerdo.

Şorişê Rojavayî: Seba xoverdayîşê dekolonyalîzmî rayîrêko rast o

Profesor Stellan Vinthagenî va, “Şorişê Rojavayî sey estareyî çirûskîyeno. Şar bi keda xo azadîya xo awane kerda. No raşta zî serkewtişêko pîl o. Ez sey Zapatîstayan, amayoxê Kurdan zî xoverdayîşê dekolonyalîzmî de vînena û Şorişê Rojavayî rayîrêko rast o. No şoriş ters dano xeylê dewletan. No sîstemo xoser û alternatif ters dano dewletanê pîlan zî.”

‘Rejîmê Tirkan kewto teşwişe’

Derheqê kerdenanê Tirkîya de Profesor Vinthagenî va, “Kurdan Rojava de sîstemêko demokratik awan kerd û no bandorê pêroyê Kurdan keno. Bandorê şorişî ver rejîmê Tirkan kewto teşwişe. Tirkîya nêwazena Şorîşê Rojavayî aver de şêro. Coka wazena şorişî çin bikera. Ganî xoverdayîş û paştîdayîşî bêrê xurtkerdiş.”

‘Otonomîyan de beşdarîya şarî esas a’

Prosesor Stellan Vinthagenî peynî de va, “Ganî şar wayîrê şorişî bivejîyo û xoserîye bêra pawitene. Kurdan zî Zapatîstayan zî mojna ra ke îdareyo otonom rayîrêko rast o û otonomîyan de beşdarîya şarî  esas a. Ganî destvisteyê şorişî bi stratejîyanê rastan bêrê pawitene.”