Emrullah ACAR / MA
Bakûr û Rojhelatê Sûrîyeyî de cinîyî rencberîye de wayîrê rolêkî pîlî yê.
Bakûr û Rojhelatê Sûrîyeyî de, cinîyî her warê cuye de rayberîye kenê. No waran ra yew zî ekonomî yo. Cinîyan 2015î de Komîteya Ekonomîyî ya Cinîyan rona û bi kooperatîfan înan xo organîze kerd. Nika 50 kooperatîfî estê û seba ke berhemî birasê şarî, xeylê warê bazaran zî ameyê awankerdiş.
Îdarekara Komîteya Ekonomîyî ya Cinîyan Gulîstan Murade va, “Şorişê 19ê Temmûze ra dima xeylê vurîyayîşî bîyê. Sere de mîyanê ekonomîyî de rolê cinîyan bedilîya. Verê şorişî, warê ekonomîyî de qet heqê cinîyan çin bi û her çî destê camêrdan de bi. Tena ameyêne waştiş ke cinîyî karanê keyeyî bikerê û miqatayê domanan bê. Cinîyan bingeyê ekkonomî de ca girewtibî la 5 hezar serran mîyan de no bedilîyabi. Şorişî ra dima, cinîyî newe ra bîyê beşdarê cuya komelkî.”
50 kooperatîfê cinîyan
Murade va, “Modelê ma komelî esas geno. Kooperatîfê ma hîna zêde warê rence de kar kenê. 45 hezar donim erazî yena ramitene. Kooperatîfê ma yê tîcarîyî zî estê. Bakûr û Rojhelatê Sûrîyeyî de 50 kooperatîfê cinîyan estê û tena cinîyî tede ca gênê. Pêro cinîyî kedêka têduşte danê û pêroyî wayîrê heqanê têduştan ê. Ma wazenê hûmara nê kooperatîfan bizêdînê.”
Felsefeyê ‘Jin, Jiyan, Azadî’
Murade dîyar kerd ke felsefeyê ‘Jin, Jiyan, Azadî’ bingeyê hereketê azadîye yê Kurdan o û va, “Seserra 21ine bîye seserra xoverdayîşê cinîyan. Cinîyî Rojava de bîyê sembolê şorişî. Ganî pêroyê cinîyê dinya rîyê biçarnê ver bi Rojavayî. Ganî bêrê û bivînê ke cuyêka newîye senî yena awankerdene. Ma tena seba cinîyanê Rojavayî ney seba pêro cinîyanê dinya xo ver danê. Cinîyî tarixî newe ra nusenê. Ma do heta peynîye bi roşnîya felsefeyê ‘Jin, Jiyan, Azadî’ xoverdayîşê xo biramnê.”
parvê bike
Nûçeyên ku dikare bala we bikşîne
