Muqaveleyo Komelkî do bibo bingeyê modelê cuya newîye

MA / Ceylan ŞAHÎNLÎ

Meclîsê Şaran ê Bakur û Rojhelatê Sûrîyeyî Muqaveleyo Komelkî qebul kerd û netîceya ci de zî do sazîyê neweyî bêrê awankerdene.

Îdareyê Xoserî yê Bakur û Rojhelatê Sûrîyeyî, nîqaş û xebatanê dergan ra dima Muqaveleyo Komelkî yo newe hedre kerd. Xeylê kombîyayîşan ra dima 12ê Kanûne de Muqaveleyo Komelkî ame qebulkerdene.

Sazîyê neweyî do bêrê awankerdene

Bi Muqaveleyê Komelkîyî, nameyê Îdareyê Xoserî yê Bakur û Rojhelatê Sûrîyeyî vurîya û bi Îdareyê Xoserî yê Demokratîkî yê Bakur û Rojhelatê Sûrîyeyî. Îdareyo Xoser do 7 kantonan ra bêro pê. Hîyerarşîya Komîteya Beledîyeyan de xeylê vurînayîşî ameyê kerdene. Nameyê ci bi Komelî û Yewîtîya Beledîyeyan. Nameyê Meslîsê Pêroyî zî bi Meclîsê Şaran ê Bakur û Rojhelatê Sûrîyeyî. Goreyê muqaveleyî do Mehkemaya Pawitişê Muqaveleyê Komelkîyî bêra awankerdene.

Hiqûqnas Mistefa Şêx Mûslîmî muqavele erjna û va, “Hetê nasname û bawerîyanê cîyayan ra xeylê nîqaşî ameyê kerdene û muqavele ameyo viraştene. Muqavele bîyo modelê mutefîkîya moderde. Modelê mehkemayan de do heqê merdiman û erjê demokratîkî bibê binge. Madeyê muqaveleyî yew bi yew nîqaş bîyê û bi temamîya rayan ameyê qebulkerdene. Pêro proses bi zelalî ame ramitene. Muqavele dînamîk o û do meseleyan çareser bikero.

‘Hêvîya modelê cuya newîye’

Mûslîmî peynîye de va, “Ma kenê ke seba sîstemêkê demokratîkî bibê modelêk. Ma hêvî kenê ke do bi muqaveleyî mîyanê şaran de berê dîalogî hîna zêde bêrê akerdene û muqavele bibo hêvîya modelê cuya newîye. Ma wazenê sîstemê ma de waştişê şaran ma rê bibê binge.”