'Tecawuzker do hesab bido'

în 7 tebaxê 2020 - 11:30

  • Çawişê dewleta tirke tecawuzê Î.A.ya 18 serre ci kerdbi. Dadîya Î.E. Hakîme Kiliç vat: ''Faîlê kênaya mi ça de yê? Wezîrê Edaletî ça de yo? Ez do hesabê kênaya xo bipersa. Heta ke tecawuzker ceza nêgêro ez rehet nêkena.''

Qezaya Beşîrî ya Êlihî de çawişê artêşa tirke Musa Orhanî Î.E.ya 18 serre rê tecawuz kerdbi.  Î.E. 16ê temmuze de xîret kerd ke xo bikişa. Î.E. mektubêk nuşt û tede qala serebûtê tecawuzî kerde. Î.E. sey birîndar xîretê xokiştişî ra dima wedarîyaye nêweşxane. Rewşa weşîye ya Î.E. xirab a. Çawişo tecawuzker Musa Orhan serebûtî ra dima amebi destbendkerdene la cade reyna ame veradayene. 

Dadîya Î.E. Hakîme Kiliç derheqê mesele de JinNewsî reyde qisey kerd û waşt ke hesabê dejanê kênaya ci wa bêro persayene. Dadî Hakîme Kiliç venga her kesî da ke vera nê hêrişê cînsîyî nêrazîbîyayîşê xo bimojno. 

Dadî Hakîme Hiliç vat: ''Çawişî kênaya mi rê gef wend. Kênaya mi waşt xo bikişa û pêro organanê ci zerar dî. Ez do ê çawişî rê hesabê nê organan bipersa. Heta ke ez weş ba sena naye xîret kena. Heta ke o cezaya xo nêgêro ez rehet nêkena. Faîlê kênaya mi ça de yê? Wezîrê Edaletî ça de yo? Çira Tayyîp Erdogan gule dano nînan? Nê çawişî dermanî dayî û wina tecawuzê kênaya mi kerd. Waşt ke aye biroşo. Kênaya mi ci ra remaye. Kênaya mi 20 rojan ra nata servîsê ciewnîyayîşê giranî de bêawe û bênan a. 

Ez do heta peynî peyê heq û huqûqî de biba. Ma seba ke çawişî ci rê tecawuz bikerê domananê xo kenê pîl? Kênaya mi nê 20 rojan de 3 reyî amelîyat bîye. Leşkerî tîya de zulm kenê. Çanteya kênaya mi de hema zî ê dermanî estbî ke çawişî dabi ci. Çira nê dermanan ra rêçê engiştî nêgêrîyayî? Her kes vera naye bêveng mend. Leşkerî koy de şaristan de tecawuzê cinîyanê ma kenê. 

Ez seba kênaya xo payan ser o ya. Wa pêro mexdûrê tecawuzî wurzê payan ser û vera nê serebûtî nêrazîbîyayîşê xo bimojnê. Hînî wa dadîyî nêdejê. Wexto ke kênaya mi sey birîndar erdî de qeldîyêne mi na laçika xo kerde ser. Laçika mi de gonîya aye esta. Ma venga ambulansî da ambulans nêame. Ma bi xo a berde nêweşxane. Dejê ma do qet kêmî nêbo.''

ANF

parvê bike

   

Yeni Özgür Politika

© Copyright 2020 Yeni Özgür Politika | Mafên belavkirinê parastî ne.