Peyas do qeyûman bişirawo

• Namzedê Hemserekîya Peyasî Cengîz Dundarî ANFyî rê pêşnîyaz û projeyê xo eşkera kerdî.

Namzedê Şaredarîya Peyasî yê DEM Partî ra Cengîz Dundarî îfade kerd ke qeyûmî wazenê roniştoxê şaristanî bênasname bikerê û wina qisey kerd: “Ma do vera hêrişan tewir û polîtîkayanê xo aver berê û şarê xo roşnî bikerê.”
Namzedê Şaredarîya Peyasî yê DEM Partî Cengîz Dundar û Bêrîvan Gulşen Sîncare yê. Cengîz Dundar 1977 de Amed de dadîya xo ra bîyo. Ey Zanîngehê Dîcle de wend û mabênê serranê 1997-2000î de HADEP de wezîfe kerd. Dundarî şubeyanê KESK û Egitim-Senî yê Amedî de zî wezîfe kerd.
Dundarî da zanayene ke qeyûman şaredarîye mîyanê deynan de verdaya û vat: “Pêro birê qeyûmî dûştê şarê ma yê. Şarê ma destê qeyûman ra ant û qeyûmî xizanîye ferzê şarê ma kerde. Bi taybetî vera ciwananê ma bi destê qeyûman polîtîkayê şerê taybetî yenê kerdene. Ma do nê meseleyan bi projeyanê xo û sey waştişê şarê ma çareser bikerê. Qeyûmî xîret kerd ke roniştoxê şaristanî bênasname bikerê. Coka warê huner, kultur û ziwanî de hewceyê şarê ma bi nasnameyê xo est o. Seba Peyasî projeyê ma yo tewr pîl pawitiş û averberdişê nasnameyî yo.
Şarê Amedî verê qeyûman de hêrsbîyaye yo. Qeyûman şarê ma û şaristanê ma kerdî xizan. Hetêkî ra polîtîkayê rantî û hetê bînî ra polîtîkayê dizdîye mîyanê pêro komelî de ameyî vilakerdene. Vera qeyûman hem tewirê ma, hem zî tewirê şarê ma zêde yo. Vera Kurdistanî hêrişêko cidî est o. Ma do vera nê hêrişan tewir û polîtîkayanê xo aver berê û şarê xo roşnî bikerê.” XWEBÛN