Armancê dewleta tirke îşxal o

• Hetkarê Verênî yê Wezîrê Karanê Teberî yê Misirî Cemal Eldîn Beyyûnîyî îfade kerd ke welatê înan nêeşkeno rewşa Lîbya temaşe bikero û vat: ''Dewketa tirke bêexlaq a û armancê ci îşxal o.''

Hetkarê Verênî yê Wezîrê Karanê Teberî yê Misirî û Sefîrê Berzî Cemal Eldîn Beyyûnîyî rewşa peyêne ya Misir û Lîbya û tewirê dewleta tirke û dinya ANFyî rê ercnayî.

Beyyûnîyî pare kerd ke Misir vera serebûtanê ke qewimîyenê do bêveng nêmano û vat: ''Heqê ma yo tabî yo ke ma 2 mîlyon hemwelatîyanê xo yê ke Lîbya de yê bipawê.'' 

Beyyûnîyî ard ziwan ke Tirkîya seba ke bikewa Lîbya Birayanê Misilmanan xebitnena. Beyyûnîyî vat: ''Tirkîya Seracî reyde pêvînayîş û pêkerdişêk kerd. Tirkîya do pê rayîrê cerganê ke Sûrîye ra ardî do mudaxeleyê Lîbya bikera. Rîsipîyanê Lîbya seba mudaxele selahîyet da Misir. Qanûnê Neteweyan ê Yewbîyayeyan zî seba pawitişê hemwelatîyanê ma heq danê. Mabênê Tirkîya û welatanê Dengizê Sipî de peymanêke esta. Goreyê na peymane ma vera qaçaxçîyan, bazirganîya merdiman û terorî do pîya têbigêrê. La Tirkîya dkewtişê Lîbya ra dima nê madeyî bin pay kerdî. Tirkîya bi hawayêkê bêexlaqî têgêrena. Meseleya Birayan ê Misilmanan zî ma zaf qerqilnena. Ma Misir de vera nînan şer kerd û ma ê şiknayî. Urdun û Tunus zî sey ma ewnîyeno Birayan ê Misilmanan. Tirkîya wazena Lîbya îşxal bikera û bi se serran uja de bimana. Xora cara Wezîrê Pawitişî yê Erdoganî vat 'Uja erdê ma yo şima îşxal kerd'. O wext çira nêşinê Avusturya û Macaristan? Tirkîya cergan û Birayanê Misilmanan ra hezêk girewt û pê nînan mudaxeleyê her cayî do bikera. Yeno vatene ke Tirkîya 5 taburî berdî Lîbya. La şar pê înan qayîl nîyo çenke nê taburî cergan ra yenê meydan. Tirkîya wazena Herêma Kurdîstan îşxal bikera û Rojawan zî îşxal kerdo cara. Na dişmenî ya. Tirkîya nika zî wazena temamîya Sûrîye îşxal bikera. Fransa paştî dana ma. Bi taybetî Macronî vat ke 'Kerdişê Tirkîya vera NATOyî yê.' Ma vera Tirkîya xîretn kenê ke rayumûmîya dinya hîşyar bikerê. Welatanê Ereban de zî Katar hetê Tirkîya de ya. La ganî welatê sey Tunus, Cezayîr û Lîbya vera Tirkîya tewirê xo zelal bikerê.''