Awuqat Demîr: Ganî seba tehlîyeya Abdullah Ocalanî şertî bêrê peydakerdene

• Awuqat Berhîvî Demîrî derheqê rewşa Serekê PKKyî Abdullah Ocalanî de va, “Ganî tehlîyeya bişerte bêra qiseykerdene û şertî bêrê peydakerdene.”

Serekê PKKyî Abdullah Ocalanî ra 35 aşmî yo xebere nîna girewtene. 22yê Çeleyî de 330 awiqatan bi waştişê Abdullah Ocalanî reyde pêvînayîşî Wezaretîya Edaletî rê muracat kerd. Nê muracatkerdoxan ra awuqat Berhîvî Demîrî rewşe ser o erjnayîşî kerdê.
 
Pozîsyonê Abdullah Ocalanî
Demîrî dîyar kerd ke çareserîya meseleya Kurdan de Abdullah Ocalan pozîsyonê xo paweno û va, “Tecrîdo ke ey ser de yeno ramitene, tesîrê ekonomîyî zî keno. Seba ke meseleya Kurdan bi rayanê demokratîkan bêra çareserkerdene, vernîya demokrasî bêra akerdene û vengê haştîye bêro eşnawitene ganî tecrîdo ke Îmrali de yeno ramitene bêro wedartene.”
 
‘Ganî tehlîyeya bişerte bêra qiseykerdene’
Demîrî dîyar kerd ke kesanê ke cezaya muebbetî girewta heqê înan o tehlîyeya bişerte est o la seba ke tehlîyeya Abdullah Ocalanî bêra astengkerdene qanûnêko taybet ameyo hedrekerdene. Demîrî dîyar kerd ke bi madeyê 17. yê qanûnê înfazî heqê tehlîyeya bişerte ameyo astengkerdene. Demîrî va, “Yeno zanayene ke no madde ‘Heqê Hêvîye’ binpay keno. 2014î de Mehkemeya Heqanê Merdiman a Ewrûpayî qerar da ke no madde ‘Heqê Hêvîye’ yê Abdullah Ocalanî binpay keno. Ganî tehlîyeya bişerte bêra qiseykerdene û şertî bêrê peydakerdene. Seba demokratîkbîyayîşê Tirkîya, azadîya fizîkî ya Birêz Ocalanî elzem a. Eke hiqûq vera her kesî têduşt o ganî goreyê maddeyê 10. Yê Qanûnê Bingeyî her kes bieşko ci ra bi têduştî havile bigero.  Birêz Ocalan zî tede yo.” MA / Omer AKIN / ŞIRNEX