Bûldan: Heta hesabdayîşî do dewaya Roboskî meqedîya

• Seba qetîlbîyayîyanê qetlîamê Roboskîyî bernameyê yadkerdişî ame viraştene.

28ê Kanûne 2011î de teyareyanê arteşê Tirkîya dewijê dewa Roboskî yê qezaya Qilebanî ya Şirnexî bombardıman kerdibî û ekserîyê înan doman û ciwanî 34 kesî kiştibî. Serrgêra 11ine ya qetlîamî de Roboskî de bernameyê yadkerdişî ame viraştene û qwetilbîyayeyî ameyê yadkerdene. Merdimê qetilbîyayîyan û xeylê îdarekarê partîyan û sazîyan bîyê beşdarê yadkerdişî.

Bernameyê yadkerdişî de fotografê qetilbîyayîyan ameyê wedartiş û pankartê ‘Ma Roboskîyî xo vîrî nêkenê û nêdanê vîrrakerdiş’î ame akerdene. Yadkerdişî de Hemsereka Pêroyî yê HDPyî Pervîn Bûldane qisey kerd û nê çîyî vatê:

“Ma reyna keyeyanê 34 merdimanê ke Roboskî de ameyê kiştişî rê û şarê xo rê serweşîye wazenê. 11 serrî ser ra vîyartê la cigêrayîşo hîra nêameyo kerdene. Kerdoxî nêameyê eşkerakerdiş. No seba Tirkîya şermêko pîl o. Eynî wext de bîrînêka xorîn a.

Kesanê ke ferman dayo eşkera yê. Çîyê ke orte de çin ê hiqûq û edalet ê. Ganî no zîhnîyet hesab bido la ê hêrîşa heqwaştoşan kenê. Zîhnîyeto ke lepate eşta Ferhat Encu û bomba varnayê 34 kesan ser eynî zîhnîyet o. 

Na dewa do meqedîya. Heta ke kerdoxî hesab bidê, heta ke fermandayoxî hesabê qetlîamî bide ma do xoverdayîşê xo biramnê. Na birine birîna ma pêrunan a, dej dejê ma perûnan o. Heta ke edalet meyero ca na birine do weşe meba. Ma keyeyanê qetilbîyayîyan ra vanê şima tena nîyê, peye şima de mîlyonî estê. Ez lew nana destê dayîkan ra.”

Qiseykerdişan ra dima kesê ke tewrê yadkerdişî bîyê şîyê mezalan ser û vilî erzîyayê sere mezelan. Peynî de merdimanê qetilbîyayîyan rê serweşîye ameye waştene.

ŞIRNEX