DEM Partî bi 7 ziwanan kombîyayîş kerd

• DEM Partî bi wesîleya Roja Ziwanê Dayîke ya 21ê Sibate bi 7 ziwanan kombîyayîş kerd. Hemserekê Pêroyî Tuncer Bakirhanî bi temamî kurdkî qisey kerd.

DEM Partî bi wesîleya Roja Ziwanê Dayîke ya 21ê Sibate bi hewt ziwanan kombîyayîş kerd. Hemserek Tuncer Bakirhanî bale ante girîngîya ziwanê dayike û ard ziwan ke ganî ziwanê kurdkî bibo ziwano resmî.
Bakirhanî nuştox û şaîrê kurdî yad kerdî. Bakirhanî bale ante polîtîkayanê asîmîlasyonî yê vera kurdkî ser û vat: “Ziwanê ma bi xoverdayîşê şarê ma resa nê rojan. Dewlete kurdkî sey dersa weçinite kerde dibistanan la mamostayan tayîn nêkena. Ronîyayîşê Tirkîya ra nata tedayê vera kurdkî nêqedîyenê. Bi taybetî darbeya qeyûman ra dima tedayê vera kurdkî zêdîyayî. Qeyûmî dişmenê kurdkî yê.
Vera polîtîkayanê asîmîlasyonî ganî ma her cade de bi ziwanê xo qisey bikerê. Ziwanê ma estbîyayîşê ma yo. Nika verê ma de weçînayîşî est ê. Ma do ser bikewê, qeyûman bişawê û ancî şaredarîyanê xo bikerê şaredarîya pirrziwane. Ziwanê ma xeta ma ya sûr a. Ma do kursanê kurdkî abikerê. Ma dûştê dersanê weçîniteyan nîyê la ziwanê ma yê dayîke heqê ma yo. Ma wazenê ke kurdkî wa biba ziwanêko resmî.”
Dima Salîha Aydenîze bi kirdkî, George Aslanî bi suryankî, Bereket Karî bi erebkî, Zeynep Bayrame lazkî, Murat Mikçiyî zî bi armenkî selam da grûbe. XWEBÛN