Derhêner Karaman: Tîyatroyê Kurdkî de ruhêko cîya esto

• Derhêner Nazmî Karamanî va, “Tîyatroyê Kurdkî de ruhêko cîya esto û no heqê pêro astengîyan ra yeno.”

EYLEM AKDAG – BAZÎD EVREN / MA / DÎYARBEKIR

Kayê ‘Seyrana Li Çeper’ heetê Nîsk Hunerî ra ameyo hedrekerdiş û nika bajar bi bajar gêreno. Kay hetê Fernando Arrabalî ra ameyo nuştiş, hetê Aydin Rengînî ra açarîyayo Kurdkî û derhênerîya kayî hetê Nazmî Karamanî ra ameya kerdene. 

Derhêner Nazmî Karamanî derheqê rewşa tîyatroyê Kurdkî de va, “Şima wexto ke kayêk nusenê, ziwanê ci çi beno bibo ganî bêro kaykerdene. La xeylê reyan kayê ma yenê qedexekerdiş. Ti biewnê tedeyîya kayî çîyêk çin o. La kayê ma yenê qedexekerdiş. Çunke Kurdkî yê. Seba ke kayê ma Kurdkî yê yenê qedexekerdiş. Çend qedexe kenê wa bikerê, ma ganî kayanê neweyan hedre bikerê û kay bikerê. Ganî hunermandî bi no qeyde cewab bidê qedexeyan.

‘Ma waranê azadan awan kenê’

Karamanî va, “Wextêk tîyatro yê bindestan bî. La tîyatroyê Kurdkî ne yê bindestan ne zî yê serdestan o. Warê ey zî azad o. Ma rey-rey kayan açarnenê la hîkayeyê înan zî nêzdîyê hîkayeyanê Kurdan ê. Qereqterî û çarçowe zî Kulturê Kurdan rê nêzdî yê. Bin o qeyde ma warêko azad o cîya awan kenê. No hem seba ma hem seba teşaşekerdoxan çîyêko baş o. Heya, xeylê eywanê ma çin ê, kêmanîyê ma estê û qedexeyî zî estê la mîyanê nê tenganîyan de berhemê cîyayî vejîyenê meydan. Tîyatroyê Kurdkî hem hetê kaybazîye ra hem zî hetê grûban ra xeylê aver de şi.”

‘Tîyatroyê Kurdkî rayîr geno’

Derheqê rewşa tîyatroyê Kurdkî de Karamanî peynî de va, “Kayê ke bi Kurdkî yenê kaykerdene, wina kayê yewverî nîyê. Tîyatroyê Kurdkî binê bandorê cayêkî de nîyo. Bi temamî bi îradeyê xo raye geno. Coka kayê ke yenê kaykerdene hem hetê kulturî ra muh3im ê û tede xeylê mesajî zî yenê dayene. Aye ra zî kayî hîna azad û gande yê. Tîyatroyê Kurdkî de ruhêko cîya esto. No ruh çend şino pîl beno. Hem hetê elaqeyê temaşekerdoxan ra hem hetê kaybazan ra. Grûbê tîyatroyê Kurdkî vejîyenê turneyan, ma pêro temaşekerdoxan ra vanê wa bêrê kayanê ma temaşe bikerê. Ma do pêro pîya hunerî aver de berê.”

Kaybazanê kayê ‘Seyrana Li Çeper’î ra Mizgîn Gulane û Habîb Çelîkî zî derheqê kayî de û rewşa tîyatroyê Kurdkî de erjnayîşî kerdê.