‘Şanoya Bajêr a Amedî waro alternatîf awan kena’

Bazîd EVREN – Rewşan SAGLAM MA / AMED

Kaykerdoxanê Şanoya Bajêr a Amedî ra Berfîn Emektare dîyar kerd ke tiyatroya Kurdkî xo birêxistin kerda û vera teda û astengîyan alternatîfan awan kena. 

Şanoya Bajêr a Amedî vera teda û astengîyan bi kayanê kurdkî faalîyetanê xo ramnena. Şano do aşma Êlule de bi 5 kayanê mêmanan û satanp-upî vejîya vernîya temaşekerdoxan. Kaykerdoxanê Şano ra Berfîn Emektare derheqê muhîmîya xebatanê tîyatro, zehmetîyan û sezonê neweyî de qisey kerd.

Waro alternatîf awankerdiş

Emektare dîyar kerd ke tiyatroya kurdkî Kurdistan de birêxistin bîya û va, “Bi destê qeyûman serran ra nat asîmîlasyonêk yeno ramitene. Ma vera nê polîtîkayan wazenê tiyatroya Kurdkî pîle bîkerê. No seba pêro waran wina yo. Serranê pêyênan de ma peydakerdişê eywanan de ma zehmetîyan ancenê. La ma her ca de bi waranê alternatîfan xo rasnenê temaşekerdoxan.”

Kulturê tîyatro awan bi

Emektare va, “Amed de kulturê tîyatro ame awankerdiş. Şanoya Bajêr a Amedî birêxistin bîyo û wayîrê tecruberan o. No zî hêze dano tîyatroya Kurdkî. Tena Kurdistan de ney Tirkîya û Ewrûpa de zî temaşekerdoxê ma estê û paştî danê ma. Bitaybetî serranê pêyênan de tiyatroya Kurdkî Êlih, Wan, Îstanbûl û her lete de birêxistin bena û aver de şina.”

‘Ma paştîdayîşan û wayîrvejîyayîşî vînenê’

Emektare dîyar kerd ke germî ver 2 aşmî mabên amebi dayene û sezono newe do bi kelecanêk dest pêbikero. Emektare peynî de va, “Bernameyê aşma Êlule zî renge heyecanê ma dano teber. Tiyatroya Kurdkî seba averşîyayîşê ziwanê Kurdkî zaf muhîm a. Ma timûtim paştîdayîşan û wayîrvejîyayîşî vînenê. Sezonê neweyî dde zî ma do vera astengîyan awaranê alternatîfan awan bikerê û vejîyê verê temaşekerdoxan.”

Emektare dîyar kerd ke seba kayêkî neweyî hedreyîyê înan estê û aye silayna ke wa tîyatroheskerdoxî bêrê kayan temaşe bikerê.