Wan de projeya ‘Ji Çaran Çar, Jin Huner’ dest pêkena

Projeya ke do tede xeylê çalakîyê kultur û hunerî bêrê kerdene, 2yê Kanûne de dest pêkena.

Sazîyê Komeleya Ayren Hunerî, ŞanoWan û Komeleya Cinîyan a STARî yê ke Wan de xebatanê xo ramnenê seba ke hunermendanê cinîyan û cinîyan biyarê têhet projeya ‘Ji Çaran Çar, Jin Huner’ hedre kenê. Proje do bi atotyeyanê resim, sînema, tîyatro û muzîkî dest pêbikera. Proje do qasê serrêke dewam bikera.

Mamostaya resimî Zozan Bore derheqê proje de qisey kerd û va, “Gama verêne ya projeye atolyeya resimî ya. Qeydê atolyeya resimî ewro dest pêkenê. Qeydî do Atolyeya Aryen Hunerî de bêrê girewtene. Ma mabênê 16-40 serran de paweyê muracatê pêro cinîyan ê.”

Bore dîyar kerd ke do hetê ressame Neşe Toprake ra dersê kolajî bêrê dayene. Bore va, “Perwerdeyê kolajî do 3 rojî dewam bikero. 3 rojan ra dima kesê ke biwazê dewam bikerê do 3 aşmî perwerde bigerê.”

‘Ma wazenê wa cinîyî bêrê têhet’

Bore dîyar kerd ke xebatê ke atolyeyan ra vejîyeyê do 4 bajaranê bînan de bêrê pêşkêşkerdene û va, “Nê projeyî tena seba cinîyan ê. Ma wazenê wa cinîyê hunermendî û cinîyê hunerhesî wa fikr û hîsanê xo bi raya hunerî bidê teber. Ma wazenê dima zî nê xebatî birasê şarî. Ma wazenê wa cinîyî bêrê têhet û xebatêka komunale vejîya meydan. Bêrê tewrê xebata ma bibê.”

MA / WAN