‘Destvisteyanê Rojavayî rê hêrîşe kenê’
pêncşem 24 teşrînê 2022 - 12:02
Rayîrşîyayîşê Pirsûsî ame astengkerdiş. Hemserekê DBPyî yê Rihayî Hîdayet Enmekî va, “Seba ke destvistyen çin bikerê çi destê înan ra yeno kenê.”
DTK, TJK, DBP û HDPyî seba ke hêrîşanê Tirkîya protesto bikerê waşt Pirsûs de rayîrşîyayîşêk organîze bikerê. Verê rayîrşîyayîşî qeza hetê esker û polîsan ra gêrîyayê ablûka û rayîrşîyayîş ame astengkerdiş.
Parlamenterî nêgerîyayê qeza
Hemsereka DBPyî Saliha Aydenîze, parlamenterê HDPyî Ayşe Surucu, Omer Ocalan, Nusrettîn Maçîn, Siddik Taş û xeylê welatîyî seba rayîrşîyayîşî ameyê Pirsûs la girse hetê eskeran ra ame astengkerdiş û parlamenteri nêgerîyayê qeza.
Şar vernîya Merkezê Kulturî yê Amarayî de ame têhet û astengkerdişî ameyê protestokerdiş. Dima girse derbazê awanîya HDPyî ya Pirsûsî bi û tîya de malûmatêk ame dayene.
‘Eynî zîhnîyet’
Hemserekê DBPyî Rihayî Hîdayet Enmekî va, “Her roje malûmatê partîyan, komele û sazîyan yenê astengkerdiş. Rojava 3 rojî yo ke raştê hêrîşan yeno. 2 rojî yo ke Kobanî û dewê ci bi obusan yenê bombakerdiş. 2015î de Kobanî destê DAÎŞî ra ame xelisnayîş. Ruhê ê rojan nika xo reyna ramojneno û nika seba çinkerdişê ê ruhî hêrîşî yenê kerdene. Eşkera yo ke zîhnîyetê hêrîşkaranê ê wextî û nikayî eynî yo. Seba ke destvisteyanê Rojavayî çin bikerê, çi destê înan ra yeno kenê.”
Gazîya paştîdayîşî
Enmekî peynî de va, “Ganî şarê Pirsûsî, Rihayî û Kurdistanî vera nê hêrîşan bêveng memanê. Wa vîr ra meşêro ke, Kurdî do 4 leteyî de destvisteyanê xo heta peynî bipawê. Ganî Ewrûpa ra, Kurdistan û Tirkîya ra paştî bidîyo Rojavayî.”
Malûmat, bi slogananê ‘Bicuwîyo xoverdayîşê Kobanîyî’ qedîya.
MA / RIHA