DFG û MKG: Rojnamegeran cade veradê

• DFG û MKGyî derheqê binçimgirewtişê 5 rojnamegeran de eşkerayîye daye û înan dîyar kerd ke ganî rojnamegerî cade bêrê veradayene.

DFG û MKGyî derheqê 5 rojnamegeranê ke Izmîr de gêrîyayê binê çimî de eşkerayîye daye û înan dîyar kerd ke ganî rojnamegerî cade bêrê veradayene. Eşkerayîya nuştekîye de ame vîrardene ke muxabîrê MAyî Semra Turan, Delal Akyuz û Tolga Guney, muxabîra JINNEWSî Melîke Aydin, muxabîrê Gazete Duvarî Cîhan Başakçıoğlu û xebatkara çapemenîye ya DEM Partî Fatma Funda Akbulut gêrîyayê binê çimî.

Eşkerayîye de ame vatene ke, “Ma nêzanê rojnamegerî çira gêrîyayê binê çimî la ma eşkenê bi rehetî vajê ke embazê ma karanê xo ver gêrîyayê binê çimî. Wazenê rojnamegeran ser de tedaya xo bizêdînê. Wazenê vengê rojnamegeran bibirnê. Wazenê şar meraso heqîqetan û mîyanê zulmatî de bimano. Şima nêşkenê bin ê metodan verê rojnamegeran bigerê. Rojnamegerê wayîrê rûmetî do timûtim rêça heqîqetî ra şorê.”

MKGyî zî va, “Ma wazenê wa cade rojnemegerî bêro veradayene. 5 rojanê peyênan de 5 rojnamegerê cinîyî gêrîyayê binê çimî. 9ê Sibate de embazanê ma ra Kîbrîye Evren û Selamet Turan gêrîyayê binê çimî û Selamet Tûran ameye girewtene. Ma ewro zî bi binçimgirewtişê rojnamegeran bîyê haya.”

‘Embazanê ma cade veradê’

Peynîya eşkerayîye de ame vatene ke, “Tewr zêde nê rojan de heqîqetan rê îhtîyacîye est a. Bi binçimgirewtişê rojnamegeran azadîya çapemenîye yena binpaykerdene. Ganî pêro astengîyê ke verê azadîya îfadekerdişî gênê bêrê wedartene. Rojnamegerîye sûc nîya. Ganî embazê ma cade bêrê veradayene.”MA / AMED