Wendegehê Muzîkî yê Egîdê Cimoyî averşîyayîşo akademîk dayo xo ver

MA / Omer ÎBRAHÎMOGLU / ÎSTANBÛL

Mamosteyanê wendegehî ra Kemal Yildirimî va, “Kesê ke wazenê bi ziwanê xo perwerde bigerê wa muracatê wendegehî bikerê.”

Îstanbûl de qey yadkerdena Egîdê Cimoyî bi nameyê ci wendegehê muzîkî ame akerdene. 28ê Teşrîna Peyêne de akerdişê wendegehî ame kerdene. Xeylê beşan de do perwerde bêro dayene û muracatî dewam kenê.

Kesê ke dest bi perwrdeyî kenê, perwerdeyê înan 2 serrî dewam keno. Dersê enstrumanan, rîtm, veng û teorîkî bêrê dayene. Perwerdeyê wendegehî bi Kurdkî yeno dayene. Kesê ke Kurmancî, Kirmanckî û Sorankî zanê eşkenê muracatê wendegehî bikerê. 

Perwerdeyo akemedîk do bêro dayene

Mamosteyanê wendegehî ra Kemal Yildirimî derheqê wendegehî de qisey kerd û va, “Îstanbûl de nêzdîyê 5 mîlyon Kurdî est ê. Ma waşt wa şarê ma hem bireso ziwan û kulturê xo hem zî ma waşt wa bieşko bi ziwanê xo perwerdeyo akademik bigero. MKMyî, 35 serrî bi fedekarîyanê pîlan tradîsyonêk awan kerd û ma zî rêça înan de wazenê muzîkê Kurdî hetê akedemîkî ra aver de berê.”

Yildirimî dîyar kerd ke zaferî do perwerdeyî muzîkî ser o bê û va, “Wendekarî do her warê muzîkî de perwerdeyêko xurt bigerê. Sewbîna z3i do enstrumanan bimusê. Derheqê muzîkê Kurdan de do dersî bêrê dayene. Ganî muzîk û kulturê Kurdan hetê akademîkî ra aver de şorê. Seba ney zî Kurdistan û Tirkîya de xeylê xebatî benê. Zafî bîyê serkewte. Ma wazenê Îstanbûl de warêkî akademîkî awan bikerê.”