DTK û DBP: Şorişê Rojava rayîrê ma roşn keno

Hetê DTK û DBPyî ra ame vatiş ke, “Kesê ke erjanê merdimîye pawenê ganî wayîrê Şorişê Rojavayî bivejîyê.”

Derheqê serrgêra 11ine ya Şorişê Rojavayî de hetê DTKyî ra malumatêko nuştekî ame weşanayene. Malumatî de ame vatiş ke,”Rayberîya cinîyan û şarê Kurdî de vera barbarîya DAÎŞî erjê merdimîye ameyê pawitene. Şorişê Rojavayî ramojnayo ke şar eşkeno bi têduştîye cuya xo awane bikero. Şoriş ewro bi hêrişanê AKP-MHPyî têrî yo. No rejîm her ca de hêrişê destkewteyanê Kurdan keno.”

‘Xoverdayîşê ma do dewam bikero’

Malumatî de bale ancîyaye Lozanî ser o û ame vatiş ke, “Kurdî do sînoran wedarê. Kurdan bi ruhê Kobanî paştî da Rojva. Şorişê Rojavayî hetêk ra zî hêvîya yewîtîya Kurdan o. Seba ke verê Lozananê neweyan bêro girewtene ganî Kurdî bi ruhê Kobanî wayîrê destkewteyan bivejîyê. Şorişê Rojavayî erjê merdimîyê pawitî. Seba ke şoriş bibo qeyim ganî her kes berpirsîyarî bigero û bixebitîyo. Ma Şorişê Rojavayî selam kenê û seba ke deskewteyan bipawê, ma do xoverdayîşê xo biramnê.”

‘Şorişê pêro şaran o’

DBP zî derheqê serrgêra şorişî de hesabê xo ser ra malumatêk weşana. Malumatê DBPyî de ame vatiş ke, “Şorişê Rojavayî tena şorişê Kurdan ney yê Ereb, Ermenî, Tirkan, Asûrî û yê şaranê bînan o zî. Vera destkewtryanê Kurdan hêrişî yenê kerdene. Ganî Kurdî yewîtîya xo awan bikerê ke sînorê neweyî meyerê xêzkerdene. Şarî wazenê mîyanê haştîye de pîya bicuwîyê. Şar wazeno meseleyi w abi sîyasetê rayîrê hîrêyinî bêrê çareserkerdene. Kesanê ke cuyêka newîye awan kerda ma înan selam kenê. Ma bawer kenê ke do problemî bi xoverdayîşê demokrasî û haştîye çareser bibê. Ma xoverdayîşê şarî selam kenê û pêro hêzanê demokrat û şorişgeran ra gazîye kenê ke wa paştî bidê şorişî.”

MA / AMED