Edîtorê Rojnewsî: PDK reya verêne rojnamegeran nêremneno

Edîtorê Rojnewsî Bînary Hîdayetî derheqê girewtişê rojnameger Suleyman Ehmedî de va, “Verî zî hetê PDKyî ra rojnamegerî ameyê remnayene.”

Edîtorê Servîsê Erebkî yê Rojnewsî Suleyman Ehmed, 25ê Teşrîna Verêne de wexto ke Bakur û Rojhelatê Sûrîyeyî ra agêrayêne Berê Sînorî yê Pêşxabûrî de hetê asayîşê PDKyî ra ame girewtene. A roje ra nata ci ra xebere nîna girewtene û xeberêk nêdîyaya keye û embazanê ci.

Hetê asayîşê Dihokî ra girewtişê ci ra 6 rojî ra dima ame îdîakerdene ke ‘elaqaya Ehmedî bi rojnamegerîye çin a’.

Edîtorê Rojnewsî Bînary Hîdayetî derheqê derheqê rewşa rojnameger Suleyman Ehmedî de qisey kerd.

Hîdayetî dîyar kerd ke embazê înan wexto ke cinazaya pîyê xo ra agêrayo bi keyfî ameyo girewtene û va, “Bi resmî şi Rojavayê Kurdistanî û dima bi resmî agêra Başûr û berê sînorî de bêhiqûqî hetê asayîşê PDKyî ra ame remnayene. Seba ke bêro veradayene kede yena dayene. Nêverdenê keye û awiqatan reyde pêvînayîş bikero.”

‘Ma îdîayan red kenê’

Hîdayetî dîyar kerd ke bingeyê îdîayanê asayîşê Dihokî çin ê û va, “Sazîya Çapemenîya ya mîyanneteweyî asayîşê Dihokî de kewt têkilîye. Înan verî va uca de nîyo û dima înan eşkerayîye kerde. Înan îdîa kerd ke Ehmedî ‘PKK’yî zîyaret kerdo. Mas ey Rojnewsî nê îdîayan red kenê. Suleyman Ehmed rojnameger o. Hetê PDKyî ra tena Ehmed nêameyo remnayene. Verê cû zî Wedat Hisên seba ke Rojnewsî de xebitîyayêne ame şehîdkerdiş û nimûneyê winasî zaf ê.”
‘Kesê ke bi qelema azade nusenê yenê sûcdarkerdiş’

Hîdayetî dîyar kerd ke senî ke Tirkîya rojnamegeran ser de teda kena û PDK zî eynî çîyan keno û va, “Ajansê Rojnewsî sey bernameyê Keyeyê Barzanîyan tênêgêreno û goreyê înan xeberan nêvirazeno. Coka PDK Rojnewsî îllegalîze keno. Rojnemegerê Rojnewsî sûcdar vîneno. AKP û PDK raştîyan qebul nêkenê û vera rojnamegeran polîtîkaya înan zî eşkera ya. Ehmed rojnameger o, ganî cade verabidîyo û derheqê rewşa ci de ganî eşkerayîye bêra kerdene.”

MERKEZÊ XEBERAN