Ganî Îmrali bêro padayene

• ‘Mîtîngê Azadî û Demokrasî’ yê Esenyurtî de bi hezaran kesî ameyê têhet.

Rêxistinê DEM Partî yê Esenyurtî, meydanê Esenyurtî de bi beşdarîya hezaran kesan ‘Mîtîngê Azadî û Demokrasî’ viraşt. Hemsereka Pêroyî ya DEM Partî Tulay Hatîmogûllari mîtînd de qisey kerd.
 
‘Bêrê ma meseleya Kurdan çareser bikerê’
Hatîmogûllari dîyar kerd ke ganî tecrîd bêro wedartene û va, “40 serrî yo şer est o û meseleya Kurdan nêdameye çareserkerdene. Ziwanê Kurdan ame qedexekerdene û meseleya Kurdan nêameye çareserkerdene. Bi polîtîkayanê qeyûman mesela nêameye çareserkerdene. Bi tecrîdê Îmraliyî mesele nêameye çareserkerdene. Meseleya Kurdan meseleya her kesî ya. Na meseleya etnîkî, nasnameyî û meseleya statuyî ya. Meseleya Rojhelatê Mîyanênî û çar leteyê Kurdistanî ya. Ma vanê bêrê ma  meseleya Kurdan bi rayanê demokratîkan çareser bikerê.”
 
‘Ganî Îmrali bêro padayene’
Hatîmagûllari va, “Birêz Ocalan, demêko derg ra nata binê tecrîdî de yo û demêko derg ra nata hepis de yo. Goreyê hiqûqê mîyanneteweyî seba ey heqê hêvîye peyda bîyo. Ganî Hepisxaneyê Îmraliyî bêro padayene û tecrîdê her warê cuye bêro wedartene. Meseleyê komelkî bi dîyalog, demokrasî û sîyasetê azadî yenê çareserkerdene. Seba ke meseleyi bi rayanê demokratîkan bêrê çaresekerdene, ma xoverdayîşê xo ramnenê. Bi cumhûrîteyê demokratîkî do meseleyê Kurd û Elewîyan bêrê çareserkerdene. Her kes do bi ziwanê xo perwerde bivîno. Ma do nê ameyoxî pêro pîya awan bikerê.” MA / ÎSTANBÛL