Hemsereka KNKyî Zeyneb Murade derheqê konferansê 17inî yê Konferansê Kurdan de va, “Konferans, mojna ke ke nêşkeno estbîyayîşê Kurdan çin bikero.”
Konferansê Kurdan, emser reya 17inî Parlamentoyê Ewrûpa de ame viraştene û qedîya. Konferans 2 rojî bi nîqaşan dewam kerd û bi qebulkerdişê vilaweka netîceya konferansî ame qedîyayîş.
Seba temsîlîyetê KNKyî Hemsereka KNKyî Zeyneb Murade bîye beşdarê konferansî û aye derheqê konferansî de Ajansê Mezopotamyayî rê qisey kerd.
Têgêrayîşê hêzanê mîyannetewîyan ame rexnekerdiş
Murade dîyar kerd ke, hêrîşê ke hetê Tirkîya ra vera Rojava û Kurdistanê Başûrî yenê kerdene bi hîrayî ameyê qiseykerdiş.
Murade va, “Reyna hêrîşê kîmyewî yê ke hetê Tirkîya ra yenê kerdene ameyê nîqaşkerdene. Ame dîyarkerdiş ke, hetê Tirkîya ra vera Kurdan planê stratejîkî yenê kerdene. Babeta tewr sereke meseleye Kurdan a Tirkîya bî. Na mesele ser o nîqaşê hîrayî ameyê kerdene. Ame waştiş ke, ganî hêzê mîyannetewî nê meseleyan ser o bi cidî têbigêrê.”
Tirkîya goreyê standartan tênêgêrena
Murade dîyar kerd ke, ame dîyarkerdiş ke ganî Rayberê PKKyî Abdullah Ocalanî ser ra tecrîd bêro wedartene. Azadîya fîzîkî ya Abdullah Ocalanî û bandorê tecrîdî ameyê nîqaşkerdiş. Murade va, “Meseleya gurînayîşê çekanê kîmyewîyan ser o nîqaşî bîyê. Pisporêkî na meseleye fikrê xo pare kerdê. Ame dîyarkerdiş ke, ganî sazîyêka xosere şêra mintiqa û cigêrayîşan bikera.”
Cewabê hêrîşan
Murade dîyar kerd ke, konferans seba Kurdan destkewte û serkewtişêko pîl o û hetêk ra zî hêrîşanê Tirkîya rê cewabêk o. Murade va, “Konferansî rê beşdarbîyayîş û babetê ke ameyê nîqaşkerdene zaf muhîm bî. Armancê Tirkîya ame nîqaşkerdiş. Tirkîya, şerîkîya xo ya dewletanê bînan vera Kurdan gurînena. Wazena bi paştîdayîşê nê hêzan vengê Kurdan bibirna. No konferans, ramojna ke kes nêşkeno vengê Kurdan bibirno. Konferans, hêrîşanê Tirkîya rê cewabêk bi. Muhîm o ke babetê winasî Parlamentoyê Ewrûpayî de bêrê nîqaşkerdene.”
MERKEZÊ XEBERAN
parvê bike
Nûçeyên ku dikare bala we bikşîne
