Konferansa ‘Pêro pîya Seba Rojhelatê Mîyanên ê Demokratîkî’

10 welatan ra do 80 hiqûqnas, sîyasetmedar û roşnvîrî bibê beşdarê komxebate.

Beyrût de do derheqê komploya mîyannetewî, krîzê globali û rewşa mintiqa ser o 13-14ê Hezîrane de komxebatêk bêra viraştene.

Komxebate de do welatanê Lubnan, Iraq, Sûdan, Filîstîn, Urdun, Misir, Afrîkaya Başûre, Îran, Tirkîya, Bakur û Rojhelatê Sûrîyeyî, Kurdistan û 10 welatanê dinya ra 80 ra zêderî hiqûqnas, sîyasetmedar û roşnvîrî bibê beşdarê komxebate.

Komxebate de do komploya mîyannetewî, krîzê globalî û bandorê ci, neteweya demokratîk û rolê cinîyan û federalîzmê demokratîkî ser o nîqaşî bibê. 

Tecrîdê Îmraliyî 

Qismê dîyinî yê roja verêne de do bi sernameyê ‘Îdareyê Şarî û Astengîyî’ nîqaşî bêrê kerdene. Tîya de tecrîdê Îmraliyî ser o, sebeb û netîceyê komploya mîyannetewî, rewşa Abdullah Ocalanî û xoverdayîşê vera komploye ser o erjnayîşî bêrê kerdene.

Neteweya demokratîke û şorişê cinîyan

Roja 2yine ya komxebate de bi sernameyê ‘Rojhelato Mîyanên de Bingeyê Ronesansî’ û ‘Ver bi Rojhelatê Mîyanên ê Demokratîkî’ nîqaşî bibê. Şorişê cinîyan û neteweya demokratîke ser o erjnayîş û nîqaşî bibê û derheqê şorişê cinîyan de do sînevîzyonêk bêro ramojnayene. Reyna seba Rojhelatê Mîyanên ê demokratîkî stratejîyanê şerîkan ser o nîqaşî do bêrê kerdene. Komxebate do bi vilaweka netîceye bêra qedîyayîş.

MERKEZÊ XEBERAN