Endamê KNKyî Dr. Qadir: Seba pawitişê destkewteyan yewîya neteweyî rê hewcedarî est a

Endamê KNKyî Dr. Şêrko Mihemed Qadirî va, “Seba ke Kurdî bieşkê destkewteyanê xo bipawê yewîya neteweyî û stratejîyê şerîkî rê îhtîyacî est a.

Hêrişê ke hetê Tirkîya ra Mintiqaya Kurdistanî rê benê dewam kenê. Humara baregehanê Tirkîya rasaya asta îşxalkerdişî. Goreyê malumatan, serra 2023yî de hêrişanê Tirkîya ver 11 sivîlî merdê û 13 sivîlî zî birîndar bîyê.

Tirkîya, serra newîye de zî hêrişê xo ramitî. Bi SÎHAyan dewê Silêmanîye û Belekayetî ameyê bombakerdene.

Parlamenterê verênî yê Parlamentoya Mintiqaya Kurdistanî endamê KNKyî Dr. Şêrko Mihemed Qadirî hêrişê Tirkîya erjnayê.

‘Tirkîya qanûnan binpay kena’

Dr. Qadirî dîyar kerd ke Tirkîya kewena sehaya hewayî ya Mintiqaya Kurdistanî û qanûnan binpay kena. Ey dîyar kerd ke Tirkîya Silêmanîye, Dihok û Hewlêr de sivîlan hedef gena û qanûnanê mîyanneteweyîyan zî binpay kena. Ey va, “PDK û YNK zî vera nê hêrişan bi eşkera vengê xo nêkenê. Nê partîyî hem îtîraz nêkenê hem zî goreyê îtîrafanê Hakan Fîdanî, hêrişanê Tirkîya asan kenê.”

‘Tirkîya hemverê statuyê Kurdan a’

Dr. Qadirî dîyar kerd ke Tirkîya bi polîtîkayanê xo Rojhelato Mîyanên de bena çimeyê xeylê problem û krîzan û va, “Tirkîya, Mintiqaya Kurdistanî de hem Tirkmenan reyde hem zî êyê ke xêza îxanetî de yê reyde têkilîyanê xo ramnena. Ziyaretê Hakan Fîdanî yê ke Hewlêrî rê bîyê û partîya Tirmenan rê paştîdayîşê PDKyî na rewşe eşkera kenê. Seba ke Kerkûk mekewo destê Kurdan paştî danê Tirkmenan. Tirkîya hemverê statuyê Kurdan a û no zî sirrêk nîyo. Vera pêro heqanê Kurdan a û vera estbîyayîşê Kurdan a.”

‘Ganî yewîtîye bêra awankerdene’

Dr. Qadirî behsê rewşa Kerkûk û Musulî kerd û va, “Kerkûk û Musul goreyê maddeye 140inî yê Qanûnê Bingeyî yê Iraqî mintiqayê îxtîlafin ê. Eslê xo de nê her di bajarî zî bajerê Kurdan ê. Rewşa têmîyanêke ver nê cayî kewtê têmîyan. Dewletê Ereban paştî danê Ereban, Tirkîya zî paştî dana Tirkmenan. Wazenê destkewteyanê Kurdan çin bikerê. Ganî sere de PDK û YNK û partîyê bînî bernameyê şerikî ser de pê bikerê. Ganî Kurdî bi tek lîste bikewtêne weçînayîş la nîya nêbi. Nika eşkenê bibê yew û yewîtîya xo awan bikerê.”

‘Stratejîyê şerîkî rê îhtîyacîye est a’

Dr. Qadirî dîyar kerd ke ganî Kurdî vera hêrişanê Tirkîya bibê yew û va, “Ganî vera nê hêrişan yewîtîya neteweyî û stratejîyo şerîk bêrê awankerdene. Xususen Tirkîya her leteyê Kurdistanî de hêrişê Kurdan kena. Ganî partîyê Kurdan îşxalkaran reyde mekewê têkilîye û mebê şerîkê palnanê înan. Yewîya neteweyî û stratejîyê şerîke rê îhtîyacîya ma est a.”

MERKEZÊ XEBERAN