KNK: No şer vera pêroyê Kurdistanî yeno kerdene

KNKyî derhedê hêrişa ofîsê Hewlêrî de eşkerayîye daye û dîyar kerd ke na hêrişe tena hereketêkî Kurdan rê ney, pêroyê Kurdistanî rê ameya kerdene.

KNKyî eşkerayîya xo de va, “Îşxalkarî de pîyabîyayîş îxanet o û xetêka sûr a. Ganî qet yew hêza Kurdistanî na xete ra mevîyera.” Knkyî dîyar kerd ke ê do vera hêrişan game têpîya meerzê û ma do yewîtîya neteweyî xurt bikerê.

Konseyê Îdareyî yê Kongreya Neteweyî ya Kurdistanî(KNK), derheqê hêrişa Hewlêrî ya ke Denîz Cevdet Bulbunî amebi qetilkerdişî de eşkerayîye daye. Eşkerayîye de ame vatiş ke, “Na hêrişe tena ofîsêk rê, xebatkarêk rê nêbîya. Bi na hêrişe yewîtîya neteweyî ya Kurdan hedef gêrîyaya. Na hêrişe ramojnaya ke dişmenê ma vera yewîtîya ma çiqas eciz ê û çiqas tersenê. Ganî pêro Kurdî na rastîye bivînê û goreyê naye têbigêrê.

Persî

KNKyî dîyar kerd ke na hêrişe dewamê hêrişanê ke vera Bakûr û Rojhelatê Sûrîye, Şengal, Mexmûr, Zap, Metîna, Avaşîn û silemanîyeyî yenê kerdene yo. Ame dîyarkerdiş ke ofîsê KNKyî merkezê Hewlêrî de yo û hetê asayîşê mintiqa û îstîxabaratî ra yeno temaşekerdene û her ca de kamerayî estê û nê persî ameyê perskerdene: “Eke (hêrişkarî) nînê pawitene, qetikarî senî eşkenê mîyanê rojî de bi rehetî bêrê ofîsê KNKyî û însanan qetil bikerê? MÎT senî eşkeno mintiqa de rehet hereket bikero, ajanan peyda bikero û welatperweran qetil bikero? Kam destûr dano nînan û kam raye dano nînan?”

‘Hêrişe Kurdan û Kurdistanî rê bîya’

Eşkerayîye de ame vatiş ke, “Na hêrişe tena hereketêkî Kurdan rê ney, pêroyê Kurdan rê Kurdistanî rê ameya kerdene. Dewleta Tirke tena bi xo hêrişan nêkena, eynî wext de vera şarê ma îttîfaqan kena û îşxalkaranê bînan zî fît kena. Ganî pêroyê hêzê Kurdistanî na rastîye bivînê. Dewleta Tirke de, îşxalkaran de pîyabîyayîş îxanet û îxanet zî xetêka sûr a. Ganî qet yew hêza Kurdistanî na xete ra mevîyera.”

Hêzanê Kurdistanîyan rê gazîye

Ame dîyarkerdiş ke bi na hêrişe yewîtîya neteweyî hedef gêrîyaya û ame vatiş ke, “Ma ganî ver ana hêrişe û hêrişan, yewîtîya neteweyî xurtêr bikerê. Mas ey KNYyî pêro partî û rêxistinan rê gazîye kenê; ma ganî vera nê hêrişan bêveng mebê, hêrişan protesto bikerê û vera hêrişanê îşxalkaran bibê yew. Ma do sey KNKyî gamêk têpîya meerzê, vera hêrişan de vinderê û yewîtîya neteweyî hîna xurt bikerê.”

MERKEZÊ XEBERAN