Îdareyo Xoser: Kobanî hema zî raştê hêrişanê îmhakerdişî yeno

• Îdareyê Xoserî yê Bakur û Rojhelatê Sûrîyeyî dîyar kerd ke Kobanî hema zî raştê hêrişanê îmhakerdişî yeno û ame waştene ke wa ruhê paştîdayîşî dewam bikero.

Îdareyê Xoserî yê Bakur û Rojhelatê Sûrîyeyî, bi wesîleya 1ê Teşrîna Peyêne Roja Kobanîyî ya Dinyaye eşkerayîya nuştekîye daye. Eşkerayîye de ame vatene ke, “Şaranê dinya, 1ê Teşrîna Peyêne de seba ke paştî bidê xoverdayîşê Kobanîyî vejîyayê meydanan. Na roje, xêza modernîteya demokratîke de gamêka tarîxî ya û derheqê paştîdayîşanê şaran de zî rojêka muhîm a.”

Hêrişî destkewteyan tehtîd kenê

Ame dîyarkerdiş ke xoverdayîşê Kobanîyî mîrasê merdimîye yo ame vatene ke, “Xoverdayîşê Kobanîyî seba şaranê xoverdayoxan destewteyêko pîl o. Ma şaranê Sûrîye û Kurdistanî rê û enternasyonalîstan rê sipas kenê. Seba ke heyfê terorîstanê DAÎŞî bêro girewtene, sere de Kobanî û pêro mintiqayê ma raştê hêrişanê îmhakerdişî yenê. Dewleta tirke hêrişa erdê ma kena, çimeyanê bingeyînan çin kena û huzir û ewleyîya mintiqaya ma tehtîd kena. Heto bîn ra zî destkewteyê ke bi xoverdayîşê tarîxîyî kewtê dest binê tehtîdî de yê.”

Pêro mintiqa do bêra azadkerdene

Dewamê eşkerayîye de ame vatiş ke, “Ma do polîtîkayanê dewleta tirke teşhîr bikerê û destkewteyanê şaran bipawê. Ma soz danê şarê xo û şehîdanê Kobanîyî û ê do ma rê bibê çilaya îradeyî. Bi qerardarî û îradeyê şarê ma,  erdê ma yê ke ameyê îşxalkerdene do bêrê azadkerdene û ma do birasê serkewtişî.”

MERKEZÊ XEBERAN